Keıingi jyldarda ustazdardyń mereıin tasytyp, mártebesin asyratyn ıgi ister kóbeıdi. Ne desek te, bilim salasy qyzmetkerlerine qoshemet kóptik etpeıdi. Qazan aıynyń alǵashqy jeksenbisinde ótetin Ustazdar kúni qarsańynda Qaraǵandy oblysynda bir top muǵalimge qyzmettik páter kilti tabystaldy.
Mundaı úı 4 pedagogke Saran men Aqtas qalasynan buıyryp otyr. Bilim basqarmasynyń menshiginde bul eki qalada 24 páter bar. Al endi ǵana páterli bolǵandar arasynda jas mamandarmen birge suranysqa ıe muǵalimder de bar ekenin aıtady Qaraǵandy oblystyq bilim basqarmasynyń basshysy Gúlsim Qojahmetova.
Qyzmettik páterge qatysty ótinishter arnaıy turǵyn úı komıssııasynda qaraldy. Barlyǵy 7 ótinish kelip túsken. Komıssııa otyrysynan soń 4 ótinish maquldanyp, páter ıelerimen kelisimshart jasaldy.
«Bilim-ınnovasııa №2» lıseıinde tarıh páninen sabaq beretin Perýza Jaıyqbaeva – qyzmettik páter alǵan muǵalimniń biri. Onyń eńbek ótili 18 jyl eken. Buǵan deıin 15 jylǵa jýyq páter jaldap kelipti.
– Men Qyzylorda óńiriniń týmasymyn. Qaraǵandyǵa 2007 jyly kóship keldim. Kóp jyldan beri balalarymmen úı jaldadym. Ońaı emes, árıne. Páterdi jalǵa berýshiler jıi tólemderin ósirip jiberetin. Tipti keıde eskertpesten turyp jatqan úıimizdi satyp jibergen kezder de boldy. Qyzmettik páter berilgenine qýanyshtymyn. Endi tek kommýnaldyq qyzmetter aqysyn tóleımin. Bul – muǵalimge úlken kómek, – deıdi Perýza Jaıyqbaeva.
Búginde bilim basqarmasynyń menshigindegi barlyq qyzmettik páter ustazdarǵa berilgenin atap ótken jón.
Qaraǵandy oblysy