Prezıdent Semeı qalasynda Muhtar Áýezov pen Qaıym Muhamedhanovqa arnalǵan «Ustaz ben shákirt» eskertkishin saltanatty túrde ashty, dep habarlaıdy Egemen.kz.
Rásimnen keıin Memleket basshysy halqymyzdyń uly perzentteriniń urpaqtarymen jáne zııaly qaýym ókilderimen áńgimelesti.
– Bul – ustaz ben shákirt, aǵa men ini arasyndaǵy rýhanı birliktiń sımvoly. Shyn máninde, qos alypty bóle-jaryp qaraý múmkin emes. Olar Abaı murasyn zerttep, dáripteýge ólsheýsiz eńbek sińirdi. Tól ádebıetimizdi jańa beleske kóterdi. Muhtar Áýezov Abaıdy, Abaı arqyly qazaqty búkil álemge tanytty. Uly oıshyldyń kórkem beınesin somdap, onyń asyl murasyn adamzattyń ortaq qazynasyna qosty. Jazýshynyń ár týyndysy jurtymyzdyń júreginen óshpes oryn aldy. Muhtar Áýezov – álem ádebıetiniń shyńyna kóterilgen qalamger. Al Qaıym Muhamedhanov – uly jazýshynyń jaqyn serigi ári shákirti. Ol búkil ǵumyryn Abaıtaný, Shákárimtaný jáne Alashtaný ǵylymyna arnady. Qýǵyn-súrginge ushyrasa da, taǵdyrdyń synaǵyna qarsy turyp, eline adal qyzmet etti, - dedi Prezıdent.
Semeı qalasyndaǵy Muhtar Áýezov pen Qaıym Muhamedhanovqa arnalǵan «Ustaz ben shákirt» eskertkishiniń avtory – Nurbol Qalıev. Músin kompozısııasy qoladan, tuǵyry tutas kúrt granıtinen jasalǵan. Eskertkishtiń bıiktigi – 4 metr. О́ner týyndysy demeýshiler esebinen boı kóterdi.