Qasym-Jomart Toqaev Pavlodar oblysynyń jurtshylyǵymen kezdesýin óńirdiń tarıhı kelbeti men búgini jaıly sózben bastady, dep jazady Egemen.kz.
«Abylaıdyń aqylshysy Buhar jyraý, ǵulama oıshyl Máshhúr Júsip, Alash ardaqtysy Júsipbek Aımaýytov osynda dúnıege kelgen. Jaıaý Musa, Estaı aqyn, Sultanmahmut Toraıǵyrov, Sháken Aımanov syndy rýhanııat salasynyń aıtýly ókilderi osy óńirden shyqqan. Qanysh Sátbaev, Álkeı Marǵulan, Ermuhan Bekmahanov, Kemel Aqyshev, Shapyq Shókın sııaqty áıgili ǵalymdar – Ertis boıynyń perzentteri. Bir sózben aıtsaq, Baıanaýyl baýraıy – tektilerdiń berekeli besigi», dedi Memleket basshysy.
Sondaı-aq aımaqta «Qýatty óńirler – qýatty el» qaǵıdaty aıqyn kórinis tapqanyn tilge tıek etti.
«Bul aımaqty ekonomıkamyzdyń energetıkalyq júregi deýge bolady. Elimizdegi elektr qýatynyń 40 paıyzdan astamy osynda óndiriledi. Qazaqstanda shyǵarylatyn kómirdiń de jartysynan astamy Pavlodardyń enshisinde. Oblystyń árbir besinshi turǵyny óńdeý ónerkásibinde nemese otyn-energetıka kesheninde jumys isteıdi. Elimizdegi munaı-hımııa ónimderiniń úshten biri, ferroqorytpalardyń jartysynan kóbi osy óńirde shyǵady. Sondaı-aq bul ólke óńdeý ónerkásibiniń jáne shıkizattyq emes eksporttyń kólemi boıynsha aldyńǵy orynda tur», dedi Prezıdent.