Dzıýdodan Tashkentte ótip jatqan álem chempıonaty bel ortadan asty. Ázirge «Qazaqstan quramasy tabysty óner kórsetip jatyr» dep aıtýǵa barlyq negiz bar. О́ıtkeni jarystyń alǵashqy kúni qorjynymyzǵa qos júlde tústi. Ony asa jeńil salmaqtaǵy Ábıba Ábýjaqynova men Eldos Smetov jeńip aldy.
Qazaqstanda áıelder dzıýdosy tym baıaý damyp jatqany jaıynda talaı márte aıtyldy da, jazyldy da. Jer-jahannyń myqtylary jınalǵan jarysta buǵan deıin bir ǵana balýanymyzdyń jeńis tuǵyryna kóterilýge kúsh-jigeri jetti. Desek te Rıo Olımpıadasy men eki birdeı álem chempıonatynda qolaǵa qol sozǵan Galbadrah Otgonsesegtiń legıoner ekenin jurt jaqsy biledi. Bizdiń burymdylar eńse tikteı almaı jatqannan keıin respýblıkalyq federasııanyń basshylary Mońǵolııadan osy sportshyny attaı qalap aldyrdy. Nátıjesi jaman bolǵan joq. Galbadrah talaı baıraqty básekede el namysyn abyroımen qorǵady. Ataqty dzıýdoshy úlken sporttan qol úzgennen keıin «Endi kimge úmit artamyz?» dep qurama bapkerleri biraz bas qatyrǵany ras. Alaıda aramyzda da dúbirli dodalarda daralana alatyn arýlar bar eken. Sonyń biri – Ábıba Ábýjaqynova.
Osydan eki aı buryn Astanada ótken Azııa chempıonatynda Ábýjaqynova kúmis medal ıelengen soń «Egemen Qazaqstan» gazetine suhbat bergende «Buıyrtsa, bıyl Tashkentte shymyldyǵy túriletin álem chempıonatynda jeńis tuǵyryna kóterilý úshin barymdy salamyn. Oǵan meniń kúsh-jigerim jetedi» dep senimdi sóılegen edi. Ábıba sózinde turdy. Alǵashqy aınalymdarda Panamerıka chempıony, brazılııalyq Amanda Lıma men Eýropanyń eki dúrkin chempıony, álemdik reıtıngtiń kóshbasshysy, fransııalyq Shırın Býklıden basym tústi. Odan keıin qurlyq birinshiliginiń qola júldegeri, serbııalyq Mılısa Nıkolıchten aılasyn asyrdy. Jartylaı fınalda álem chempıony, Azııa oıyndarynyń jeńimpazy, japonııalyq Nasýmı Sýnodadan utylyp, qola medal úshin básekede Chılıdiń ókili Marı Dı Vargas Leıdi jeńdi. Osylaısha, Ábıbanyń esimi qazaq qyzdary arasynan álem chempıonatynda júlde alǵan tuńǵysh dzıýdoshy retinde tarıhta qaldy.
Bastapqy básekelerde ázerbaıjandyq Karamat Hýseınov pen ızraıldik Matan Kovalaevty qapy qaldyrǵan Eldos Smetovtiń shırek fınalda byltyr Tokıo Olımpıadasynda kúmis medaldy moınyna ilip, Azııa oıyndary men qurlyq birinshiliginde júldeger atanǵan taıpeılik Iаn Iýn Veımen joly qıysty. Iyǵynan alǵan jaraqatyn asqyndyryp alǵan áıgili balýanymyz bul básekede keńinen kósile almaı, IJF reıtınginde kósh bastap turǵan Veıge ese jiberdi. Desek te odan keıingi eki beldesýde baryn salǵan Smetov jubanysh kezdesýinde álem chempıonatynyń qola jáne Eýropa oıyndarynyń kúmis júldegeri, Eýropanyń eki dúrkin chempıony, ıspanııalyq Fransısko Garrıgosty utyp, úshinshi oryn úshin tartysta ózbekstandyq Dılshodbek Baratovtan basym tústi. Sóıtip, Eldos óziniń sporttyq mansabynda álem chempıonatynyń úshinshi júldesine qol jetkizdi. 2015 jyly ol Astanada altyn tuǵyrdan qol bulǵasa, 2019 jyly Tokıo jáne 2022 jyly Tashkentte qola medal ıelendi.
Alǵashqy kúni 60 kılo salmaqtaǵy Maǵjan Shamshadın tusaýkeser kezdesýinde ıtalııalyq Andjelo Pantanoǵa ese jiberse, kelesi kúni 66 kılo salmaqtaǵy Ǵusman Qyrǵyzbaev ta súrindi. Soqyr jerebe ony ekinshi aınalymda An Baýlmen jolyqtyrdy. Ońtústik Koreıa ókiliniń Rıo Olımpıadasynyń kúmis, Tokıo Olımpıadasynyń qola júldegeri, álem chempıony jáne Azııa oıyndarynyń jeńimpazy degen ataqtary bar. О́kinishke qaraı, Ǵusman Annan aılasyn asyra almady. 52 kılo salmaqtaǵy Gaýhar Irmaǵambetova «shúý» degende shveısarııalyq Fabıne Kosherdi shabysynan jańyldyrǵanymen, ekinshi kezeńde polshalyq Aleksandar Kaletadan jeńilip qaldy.
Jarystyń úshinshi kúni Danııar Shamshaev tatamıge shyqty. Taıaýda ǵana Astanada ótken Azııa chempıonatynda barlyq qarsylasyn sypyra utyp, bas júldeni oljalaǵan 18 jastaǵy jas balýanǵa О́zbekstannyń bas shaharynda aıryqsha senim arttyq. Sol kezde oǵan qurlyqtyń eń úzdik dzıýdoshysy atanýǵa nebári 149 sekýnd jetkilikti bolǵan edi. О́kinishke qaraı, jyldyń basty dodasynda Danııardyń joly bolmady. Alǵashqy synaqtan ol súrinbeı ótkenimen, ekinshi kezeńde koreıalyq Lı Enhýýlden utyldy.
56 kılo salmaqtaǵy Sevara Nyshanbaeva Bosnııa men Gersegovınanyń ókili Andjela Samarandjıchke jol berdi. 81 kılo salmaqtaǵy Abylaıhan Jubanazarov nıderlandtyq Frank de Vıtten aılasyn asyra almady.
Jarystyń jeńimpazdary men júldegerleri
Erler: 60 kılo – 1. Naohıso Takato (Japonııa), 2. Arýnbold Enhtaıvan (Mońǵolııa), 3. Eldos Smetov (Qazaqstan) pen Iаn Iýn Veı (Taıpeı).
66 kılo – 1. Dzıosıro Marýıama (Japonııa), 2. Hıfýme Abe (Japonııa),
An Baýl (Ońtústik Koreıa) men Denıs Vıerý (Moldova).73 kılo – 1. Tsogbaatar Ent-Ochır (Mońǵolııa), 2. Soıshı Hashımoto (Japonııa), 3. Danıel Gargnın (Brazılııa) men Hıdaıat Heıdarov (Ázerbaıjan).
Áıelder: 48 kılo – 1. Nasýmı Sýnoda (Japonııa), 2. Katarına Mens (Germanııa), 3. Ábıba Ábýjaqynova (Qazaqstan) men Assýnta Skýtto (Italııa).
52 kılo – 1. Ýta Abe (Japonııa), 2. Chelıse Gıles (Ulybrıtanııa),
Dıstrııa Krasnıkı (Kosovo) men Amandı Býshar (Fransııa).57 kılo – 1. Rafaela Sılva (Brazılııa), 2. Harýka Fýnakýbo
(Japonııa), 3. Djessıka Klımkaıt (Kanada) pen Enherlen
Lhkagvatagoo (Mońǵolııa).