Almatyda Qarttar aılyǵy aıasynda II Dúnıejúzilik soǵys jáne tyl ardagerlerine arnalǵan kúzgi merekelik is-shara ótti. Bıyl besinshi jyl qatarynan ótken dástúrli basqosýdy Soǵys jáne eńbek ardagerleriniń qalalyq keńesi uıymdastyryp otyr.
Jastyq shaǵy qyrǵı-qabaq soǵys pen el basyna týǵan qıyn jyldarmen betpe-bet kelgen ardagerler búgingi táýelsiz eldiń jarqyn kúnderin kóre almaı ketken qatarlastaryn saǵyna eske alyp, estelikterimen bólisti. Janarlarǵa jas uıalap, talaı ómirdi qyrshyn etken soǵys ta, azaly jyldar da kelmeske ketsin degen tilekterin bildirdi.
Ardagerler kúzgi merekeni erekshe kóńil kúıde ótkizdi. Olar óleń oqyp, bı bılep, túrli aspaptarda oınap, uıymdastyrýshylar tarapynan syı-sııapatqa ıe boldy.
«Soǵys jáne eńbek ardagerleriniń qalalyq keńesi» QQ atqarýshy dırektory Raıhan Japarhanova úlkenge izet kórsetýdiń osyndaı úlgisin jas urpaq arasynda nasıhattaýdy maqsat etedi. Atalǵan qor qoǵamdyq ınstıtýt retinde soǵys jáne eńbek ardagerlerine qurmet kórsete otyryp, olardy tolǵandyrǵan máselelerdi der kezinde sheshýge yqpal etip keledi. Qıyn-qystaý jyldardy basynan keshirgen ardagerler búginde úlken qurmetke laıyq.
ALMATY