14 qazanda Astanada Prezıdent Qasym-Jomart Toqaevtyń jetekshiligimen TMD Memleketter basshylary keńesiniń otyrysy ótedi. Bul týraly Syrtqy ister mınıstrliginiń resmı ókili Aıbek Smadııarov aıtty, dep habarlaıdy Egemen.kz.
«TMD Memleket basshylarynyń keńesi – Dostastyqtyń negizgi máseleleri talqylanatyn jáne sheshiletin joǵarǵy organy. TMD sammıti Qazaqstannyń osy uıymǵa tóraǵalyǵy aıasyndaǵy mańyzdy sharalardyń birine aınalady. Pandemııadan keıingi kezeńde alǵash ret TMD-ǵa múshe memleketterdiń barlyǵy derlik basshylary bul mańyzdy sharaǵa jeke qatysady», dedi Aıbek Smadııarov Syrtqy ister mınıstrliginde ótken brıfıngte.
Aıbek Smadııarovtyń aıtýynsha, sharaǵa Ázerbaıjan, Armenııa, Belarýs, Qyrǵyzstan, Reseı, Túrikmenstan, Tájikstan, О́zbekstan basshylary, sondaı-aq TMD Atqarý komıtetiniń tóraǵasy – Atqarýshy hatshysy qatysady.
«Sammıtte sońǵy jyldary TMD is-sharalaryna qatysýyn toqtatqan Ýkraınanyń ókili bolmaıdy. Sondaı-aq Moldova basshysy jumys kestesiniń tyǵyzdyǵyna baılanysty qatysa almaıdy», dedi ol.
«Is-shara barysynda Dostastyq alańynda ózara is-qımyldyń ózekti máselelerin talqylaý, saýda-ekonomıkalyq jáne mádenı-gýmanıtarlyq salalardaǵy, sondaı-aq Qazaqstandaǵy ıntegrasııalyq baılanystardy odan ári damytýǵa jáne nyǵaıtýǵa baǵyttalǵan birqatar qujattardy qaraý jáne qabyldaý josparlanýda. Atap aıtqanda, qaýipsizdik salasyndaǵy yntymaqtastyqty odan ári nyǵaıtý maqsatynda memleket basshylary 2023-2025 jyldarǵa arnalǵan terrorızm men ekstremızmge qarsy kúres salasyndaǵy yntymaqtastyqtyń kezekti baǵdarlamasyn bekitedi. Mádenı quramdas bóliktiń ıntegrasııalyq ózara is-qımyldaǵy erekshe róli turǵysynda memleket basshylary Qazaqstan Respýblıkasynyń bastamasymen mádenıet salasyndaǵy yntymaqtastyqty damytý týraly málimdeme qabyldaýdy josparlap otyr», dedi Syrtqy ister mınıstrliginiń resmı ókili.
Mınıstrlik sondaı-aq saılaý organdary arqyly ózara is-qımyldy kózdeıtin, sondaı-aq sybaılas jemqorlyqqa qarsy is-qımyl máseleleri boıynsha birqatar halyqaralyq sharttarǵa qol qoıylatynyn túsindirdi.
«Sammıtte sondaı-aq 2023 jyly TMD-ǵa tóraǵalyqty Qyrǵyz Respýblıkasyna berý jáne Memleket basshylary keńesiniń kelesi otyrysyn Bishkekte ótkizý týraly sheshim qabyldaý josparlanýda. Memleket basshysy elimizdiń TMD-ǵa tóraǵalyǵynyń qorytyndysyn shyǵarady dep kútilýde», dedi Aıbek Smadııarov.