4 qazanda polısııaǵa 34 jastaǵy jergilikti turǵyn kelip, «Qypshaq» jaıylymynyń janynda 46 jylqy joǵalyp ketkenin málimdedi, dep habarlaıdy Egemen.kz.
Er adam fermada úsh jylqy tabyny bar ekenin aıtty. Maldyń júrgen jerin baqylap otyrý úshin ár tabyndaǵy jylqylardyń birine GPS trekeri bekitilgen. Qyrkúıek aıynyń ortasynda joǵalǵan tabynda belgi bolmaǵan. Iesi izdeýdi óz betinshe jalǵastyrǵan.
Qylmysty ashý úshin polısııa basqarmasynda eki jedel-tergeý toby qurylǵan. Jedel jumys nátıjesinde Arqalyq polıseıleri eki kún ishinde 46 jáne 47 jastaǵy eki kúdikti retinde Aqmola oblysynyń turǵyndaryn anyqtaǵan.
Jedel ýákilder kúdiktilerdiń mal urlaý úshin oblys aýmaǵyndaǵy jáne kórshi óńirlerdegi jaıylymdardy maqsatty túrde aınalyp ótkenin anyqtady. Er adamdar kólikpen jáne motosıklmen júrgen. Terisaqan aýylynan 200 shaqyrym jol júrip ótip, jylqylar shoǵyryn baıqaǵan olar maldardy Aqmola oblysyna aıdap áketýdi uıǵarady. Dalalyq jolda jylqy urlaýshylar urlanǵan maldy qoraǵa aıdap, treket salynǵan jylqydan qurylǵyny alyp tastaıdy. Kúdiktiler kelesi kúni maldy Aqmola oblysynyń turǵyndaryna satyp úlgergen.
«Atalǵan fakti boıynsha QR QK 188-1-baby «Mal urlyǵy» boıynsha sotqa deıingi tergeý júrgizilýde. Qamysty aýdanynda da polıseıler qysqa merzimde joǵalyp ketken aǵylshyn-qarashaı tuqymynyń jylqysyn taýyp, ıesine qaıtardy. Aýyl turǵyny jergilikti ýchaskelik Baýyrjan Nurmanovtan kómek suraǵan. Izdeý is-sharalary barysynda polısııa qyzmetkeri maldy taýyp, aýyl turǵynyna qaıtaryp berdi», dep jazylǵan Polisia.kz taratqan aqparatta.