Qazaqstan Prezıdenti laýazymyna kandıdattardy usyný 23 qyrkúıekten 11 qazanǵa deıin jalǵasty, dep habarlaıdy Egemen.kz.
QR Prezıdenttigine kandıdattardy usyný keshe saǵat 18:00-de aıaqtaldy.
«Ortalyq saılaý komıssııasyna respýblıkalyq qoǵamdyq birlestikter usynǵan 12 kandıdattyń qujattary usynyldy», dedi OSK hatshysy Muhtar Erman.
Kezekten tys Prezıdent saılaýyna Memleket basshysy Qasym-Jomart Toqaev halyqtyq koalısııadan, Meıram Qajyken «Amanat» Qazaqstan kásipodaqtar Dostastyǵy» respýblıkalyq kásipodaqtar birlestiginen qatysýdy josparlap otyr. Sondaı-aq ulttyq kásibı áleýmettik qyzmetkerler alıansynan Qaraqat Ábden, «Aýyl» partııasynan Jıgýlı Daırabaev, Jalpyulttyq sosıal-demokratııalyq partııadan Nurlan Áýesbaev saılaýǵa túsedi.
Sondaı-aq Talǵat Erǵalıev Qazaqstan qurylysshylar Odaǵynan, Jumataı Álıev «Halyq demografııasy» qoǵamdyq birlestiginen, Saltanat Tursynbekova «Qazaq taldary – dástúrge jol» respýblıkalyq qoǵamdyq birlestiginen, Nurjan Áltaev «Muqalmas» RQB-nan, Haırýlla Ǵabjalılov Oralmandardyń «Asar» respýblıkalyq qoǵamdyq birlestiginen óz kandıdatýralaryn usyndy.
Aıta ketsek, QR Prezıdenttigine kandıdattardy tirkeýdiń sońǵy kúni Ortalyq saılaý komıssııasyna «Qazaqstan fýtbol áýesqoılary lıgasy» qoǵamdyq birlestiginen Baqyt Jańabaev jáne «Praktıkalyq psıhologııa» respýblıkalyq qoǵamdyq birlestiginen Fatıma Bızakova óz qujattaryn tapsyrdy.
Saılaý 20 qarashaǵa josparlanǵan. Qazaqstan Prezıdenttigine kandıdattar úshin saılaý jarnasynyń mólsheri 3 mln teńgeni quraıdy. Kandıdattyń týýy boıynsha QR azamattyǵy, joǵary bilimi, el aýmaǵynda sońǵy 15 jyl turýy tıis. Jasy kem degende 40 jasta bolýy kerek. Úmitkerdiń belsendi saılaý quqyǵy bolýy, memlekettik qyzmette nemese saılanbaly laýazymdarda keminde 5 jyl jumys tájirıbesi bolyp, memlekettik tildi erkin meńgerýi tıis. Qazaqstan Prezıdenttigine árbir kandıdat 118 myń qol jınaýy tıis.