Astanadaǵy «Otan Ana» monýmentiniń janyndaǵy «Otan qorǵaýshylar» alańynda ásker qataryna shaqyrylýshylardy Qazaqstan Qarýly Kúshteriniń qataryna saltanatty shyǵaryp salý rásimi jáne «Astana jastary men armııa – birtutas» aksııasynyń ashylý saltanaty ótti.
Astana qalasynyń Qorǵanys isteri jónindegi departamenti «Nur Otan» partııasy Astana qalalyq fılıalynyń, «Jas Otan» jastar qanatynyń qoldaýymen uıymdastyrǵan is-shara áskerı qyzmettiń bedelin arttyrýǵa, jasóspirimderdi Qazaqstan armııasynyń qataryndaǵy qyzmetke daıyndaýǵa baǵyttalyp otyr.
Jastar aldynda Qarýly Kúshterdiń ardagerleri, «Nur Otan» partııasynyń ókilderi sóz sóıledi.
Is-shara barysynda dóńgelekti áskerı tehnıka men atys qarýlary, sarbazdardyń kıim-keshek úlgileri, sondaı-aq, ásker tekteri men túrleri kórsetilgen kórme ótti. Elorda turǵyndary men meımandary atys qarýlarymen jáne usynylǵan áskerı tehnıkamen tanysa aldy.
Bul aksııaǵa 3000-ǵa jýyq ásker qataryna shaqyrý jasyna deıingi jáne ásker qataryna shaqyrý jasyndaǵy jastar qatysty.
Kóktemgi áskerı qyzmetke shaqyrý aıasynda Astana qalasynan 500-ge jýyq ásker qataryna shaqyrylýshy merzimdi áskerı qyzmetke jiberiledi. Jas býyn Aeroutqyr áskerleri men arnaıy áskerler bólimderiniń sapyn tolyqtyratyn bolady. Bıylǵy kóktemde Qazaqstan Respýblıkasynyń Qarýly Kúshterine, basqa da áskerleri men áskerı quralymdaryna 11 myńnan astam adam shaqyrylatyn bolady.
Saltanatty is-shara QR QK Aeroutqyr áskerleri desanttyq-shabýyldaý brıgadasynyń «Qalqan» arnaıy maqsattaǵy vzvodynyń jáne Memlekettik kúzet qyzmeti qurmet qaraýyly rotasynyń óner kórsetýine ulasty.
«Egemen-aqparat».