El astanasynda keńes kezeńinde qýǵyn-súrginge ushyraǵan qazaq zııalylarynyń taǵdyrynan syr shertetin qundy qujattar men zattar qoıylǵan kórme ashyldy. Qoljazbalar jáne sırek kitaptar ulttyq ortalyǵynda ótip jatqan «Aljır – urpaqtar esinde» jyljymaly kórmesi ótken ǵasyrdyń 30-50-jyldardaǵy tarıhı oqıǵalardy umytpaýdy, aýyr tragedııanyń qaıtalanýyn boldyrmaý úshin jas urpaqtyń boıyna otansúıgishtik pen adamgershilik qasıetin qalyptastyrýǵa yqpal etýdi maqsat etip otyr.
«Jyl saıyn bizdiń ortalyq «Aljır» memorıaldy keshenine arnalǵan kórme uıymdastyrady. Maqsat – qazirgi jáne keıingi urpaqqa «Aljır» tarıhy men sol jyldary bolǵan sumdyqtardy tanyta túsý. Búgingi kórmege HH ǵasyrdyń basyndaǵy qazaq zııalylarynyń jeke zattary, olarǵa qatysty qujattar, sýretteri men kıim-keshek taǵy basqa qundy dúnıeler qoıylǵan. Sondaı-aq bizdiń ortalyq sol ýaqytqa tıesili áli ashylmaǵan dúnıelerdi zertteýdi qolǵa almaqpyz. Taǵdyry «Aljır» lagerimen baılanysty tulǵalarǵa qatysty áli ashylmaǵan qanshama dúnıe bar», dedi Mádenıet jáne sport mınıstrligi Sırek kitaptar jáne qoljazbalar ulttyq ortalyǵynyń dırektory Jandos Boldyqov.
Aıta keteıik, «Aljır» memorıaldy kesheninen ákelingen tarıhı qundy jádigerler, qujattar men zattar kórmesin qala turǵyndary men qonaqtary qazan aıynyń sońyna deıin tegin tamashalaı alady.
«О́zderińiz biletindeı, «Aljır» lageri qalanyń syrtynda ornalasqan. Kólik máselesi bar, ekiniń biri baryp kóre almaıdy. Sondyqtan biz kelýshilerge yńǵaıly bolýy úshin kórmeni qalaǵa alyp kelip, uıymdastyryp otyrmyz», deıdi ortalyq basshysy.
Mádenı is-sharaǵa zııaly qaýym men qýǵyn-súrgin qurbandarynyń urpaqtary – Turar Rysqulovtyń, Janaıdar men Elızaeveta Sadýaqasovtardyń, Marııa Esqaraevanyń, Shaqtaı Tátimovanyń nemereleri qatysty.