«Bolashaq» qaýymdastyǵy bıyl 20 qarashada ótetin Qazaqstan Respýblıkasy prezıdentiniń kezekten tys saılaýynda qazirgi Prezıdent Qasym-Jomart Toqaevtyń kandıdatýrasyn qoldaıdy.
Qaýymdastyq prezıdenttik baǵdarlama túlekteriniń múddelerin bildire otyryp, elimizdiń tabysty qoǵamdyq uıymdarynyń biri bolyp sanalady. Osy baǵdarlama boıynsha búginge deıin 12 myńnan astam stıpendıat bilim aldy.
2001 jyldan bastap qaýymdastyqtyń músheleri bilim berý, bilimderdi tasymaldaý, saraptamalyq áleýetti qalyptastyrý, ulttyq mádenıet pen memlekettik tildi damytý salalarynda 150-den astam iri áleýmettik jobany júzege asyrdy.
Qaýymdastyq – bul turaqty damý saıasatyn júzege asyrýǵa, qyzmetkerlerdiń sabaqtastyǵyn qamtamasyz etýge, jańashyldyq jolymen ótkenniń dástúrlerin saqtap qalýǵa birikken múddeles azamattar qoǵamy. «Bolashaqtyń» basty maqsattarynyń biri – Otanymyzdyń ekonomıkalyq, áleýmettik jáne saıası damýyna úles qosý. Elimiz, onyń ishinde jastar búginde elimizge jahandyq úderisterge qatysý úshin ishki turaqtylyq qajet ekenin túsinedi.
«Qazaqstannyń ishki saıasatyn taldaı otyryp jáne eldi damytý úshin berilgen strategııalyq baǵytty nazarǵa ala kele Qasym-Jomart Toqaevtyń kópvektorly saıasaty el ekonomıkasynyń jan-jaqty damýyn, respýblıkamyzdyń halyqaralyq mártebesin nyǵaıtýdy qoldaıdy dep sanaımyz.
Qazaqstandaǵy saıası jaǵdaı turaqtylyqtyń, konfessııaaralyq kelisiminiń, eldiń barlyq azamatynyń múddesi úshin demokratııa men memlekettik ınstıtýttardyń damýynyń biregeı úlgisin búkil jahanǵa kórsetedi. Qazaqstannyń turaqty saıası damýy álemdik qoǵamdastyq úshin teńgerimdi bastamalardyń kózi retinde eldiń damýynda mańyzdy ról atqara alady jáne atqarýǵa tıis», deıdi bolashaqtyqtar.
«Búginde biz ishki jáne syrtqy saıasatymyzdyń sabaqtastyǵyn, turaqtylyǵyn rastaýymyz kerek. Elimizde áleýmettik jáne saıası úılesimdilikti qoldaý maqsatynda memlekettik strategııalaryn jáne áleýmettik baǵdarlamalaryn tabysty iske asyrýdy jalǵastyrý qajet. Saılaý bizdiń elimizdiń damýyna, geosaıası jáne ekonomıkalyq turaqsyzdyqtyń jaǵymsyz áserin boldyrmaýǵa, halyqtyń birligin nyǵaıtýǵa múmkindik beredi dep senemiz. Olaı bolsa, saılaýdy aǵymdaǵy jylda ótkizý táýelsiz Qazaqstannyń gúldenýi úshin aldymyzǵa qoıyp otyrǵan memlekettik baǵyttyń sheshýshi jalǵasy bolyp tabylady. Bizdiń tańdaýymyz otansúıgishtiktiń, memlekettiń jáne qoǵamnyń bolashaǵy úshin joǵary azamattyqtyń jáne jaýapkershiliktiń úlgisi bolýǵa tıis», deıdi qaýymdastyqtyń keńes tóraǵasy Almas Qudaıbergen.