Memleket jáne qoǵam qaıratkeri Shámsha Berkimbaevanyń týǵanyna 80 jyl tolýyna oraı Almatyda birqatar mańyzdy is-shara ótti. Qazaq ulttyq qyzdar pedagogıkalyq ýnıversıteti janyndaǵy Stýdentter úıine, oqý ornyndaǵy «Aqtumar» murajaıyna, Bilim-ınnovasııa qyzdar lıseıine ustaz esimi berildi.
Qazaq ulttyq qyzdar pedagogıkalyq ýnıversıtetinde NIS derbes bilim berý uıymynyń uıymdastyrýymen ótken «Elim dep soqqan júregi» atty kezdesýdi rektor Gúlmıra Qanaı ashyp, ıgi isteri keıingi urpaqqa ónege bolar tulǵanyń eńbek joly, taǵylymdy isteri jaıynda aıtyp ótti. Ári qaraı jıyndy kezinde osy ýnıversıtette prorektor bolyp istegen Lázzat Ádilbekova esteligimen jalǵastyryp, «Taǵylymdy ǵumyrynda ustazdyq qasıetimen jastardy tálim-tárbıe men tártipke, adamgershilikke úndep júretin qazaqtyń qaıratker qyzy eline qaltqysyz qyzmet atqardy» dep eske aldy.
Alqaly jıynda NIS Pedagogıkalyq sheberlik ortalyǵy daıyndaǵan «Shamshyraqtaı týǵan eldiń Shámshasy» derekti fılmi kórsetildi.
Eńbek jolyn qatardaǵy aýyl muǵaliminen bastap, mektep dırektory, Almaty oblystyq partııa komıtetiniń hatshysy, keıinnen Parlament Senatynyń depýtaty, Bilim jáne ǵylym mınıstri, rektor bolǵan jyldarda ǵylym, bilim salasyn damytýmen qatar ulttyq qundylyqtardy jastar arasynda dáripteýdegi, aýyl mektepterin kóterýdegi qaıratker eńbeginiń sáýleli sátterin arqaý etken shaǵyn fılmde dara minezdi isker tulǵanyń bolmysy aıshyqtaldy.
Ustazdardyń qoǵamdaǵy róli men mártebesin anyqtaǵan «Pedagog mártebesi» týraly zańnyń qabyldanýynda qoǵam qaıratkeri, akademık Shámsha Berkimbaevanyń qoltańbasy jatyr. Osy oraıda Oqý-aǵartý mınıstri Ashat Aımaǵambetov muǵalimderdiń quqyǵyn qorǵaıtyn, muń-muqtajyn qamtyp, jan-jaqty sharalar qabyldaý jónindegi zańnyń qabyldanýy qoǵam úshin asa qajet degen usynys aıtyp, ózi mınıstr bolǵan jyldarda arnaıy zańdy iske asyryp úlgermegendigin jetkizdi. «Prezıdenttiń tikeleı qoldaýymen atalǵan zań qabyldanyp, ustazdar qaýymyn tolǵandyrǵan keleli máselelerdiń sheshimin tapqanyn Shámsha Kópbaıqyzy úlken qýanyshpen qabyldady», dep eske aldy Oqý-aǵartý mınıstri.
Al rektor bolǵan jyldarda sońǵy úlgidegi «Stýdentter úıiniń» salynýyna, oqý ǵımarattary, jataqhanalar men ashanalarǵa kúrdeli jóndeý jumystarynyń júrgizilýine tikeleı basshylyq etti. Bakalavrıat mamandyqtarynyń sany artyp, magıstratýra ashyldy. Oqý zerthanalary jańa quraldarmen qamtamasyz etildi. Jastardyń bilimin jetildirý maqsatynda ataýly stıpendııalar taǵaıyndaldy.
Ustaz-ǵalymnyń jas urpaq tárbıesi men týǵan eliniń órkendeýine arnaǵan izgilikti isteri osy kezdesýdiń mańyzyn arttyra tústi.
«Nazarbaev zııatkerlik mektepteri» derbes bilim berý uıymynyń basqarma tóraǵasy Kúlásh Shámshıdınova kópshilikke Shámsha Berkimbaevanyń jýyrda jaryqqa shyqqan «Qazaq mektebi – ult tiregi» eńbegin tanystyrdy. Bul eńbekte ustazdyń uzaq jyldar boıy zerttegen qazaq ulttyq mektebiniń HV-HH ǵasyrlardaǵy qalyptasýy jáne damý tarıhy, qazaq dalasy oıshyldarynyń ulttyq mektep qurý jáne óskeleń urpaqqa ulttyq tárbıe berý týraly taǵylymdyq tujyrymdary bar. Alash qaıratkerleriniń pedagogıkalyq muralaryndaǵy qazaq ulttyq mektebin qurý ıdeıasy jáne HIH ǵasyrdyń aıaǵy HH ǵasyrdyń basyndaǵy qazaq mektepteri men bilim berý ustanymdary berilgen eńbektiń lentasyn saıasat ǵylymdarynyń doktory, professor Qýanysh Sultanov qıyp, artynda qalǵan murasyn jas urpaqqa nasıhattaýdyń mańyzyn atap ótti.
«Qarapaıym aýyl muǵaliminen memlekettik dárejede is atqarǵan qaıratkerlik qadamdary, ómirge degen qushtarlyǵy, óziniń ósýi arqyly qoǵamnyń ósýine yqpal etken tulǵa jaıynda aıtylatyn estelik kóp. Alǵashynda jastyǵyna qaramastan, ózinen keıingilerge qamqorlyǵy, janashyrlyǵy, bilim alýǵa, eńbek etýge baýlyp turatyn izgi qasıetterimen erekshelengen Seıdilda Kópbaev esimdi aǵasymen tanystym. Keıinnen osy qasıetterdiń barlyǵy bolashaq qaıratker tulǵa Shámsha Kópbaıqyzynyń boıynan tabylǵanynyń kýási boldyq. Ol osy izgilikti qasıetteriniń arqasynda halqyna qaltqysyz qyzmet etti», dedi óz sózinde Q.Sultanov.
«NIS mektebiniń rýhanı qalyptasýynda da qoltańbasyn qaldyryp, ıdeologııa, mádenıet, rýhanı qundylyqtarǵa baılanysty muǵalimderge dáris oqydy. Jumys kezdesýlerinde únemi óz tájirıbesimen, keńesterimen bólisip, bilim salasyndaǵy jańalyqtardy qadaǵalap otyrdy. Shetelder tájirıbesine zer saldy. Búginde «Pedagog mártebesi» týraly zańnyń qabyldanýynda da bilimge janashyr tulǵanyń qoltańbasy jatyr. Jadymyzda ustaz, úlken azamat retinde qalǵan ári ózi «Men qazaqtyń qyzymyn» dep jazyp ketkendeı artynda dúıim mura qaldyrdy. Táýelsiz elimizdiń irgesiniń qalanýyna orasan zor eńbek sińirdi. «Aýyl mektebi» memlekettik baǵdarlamasynyń qabyldaýyna tikeleı uıytqy boldy. Osy baǵdarlama aıasynda respýblıkada 25, keıinnen 80-nen astam mektep salyndy. Osy kezeńde Shámsha Kópbaıqyzy ózi atap ótkendeı, jalpy aýyl mektebine degen memlekettiń qamqorlyǵy ósti. Qoǵamda úlken betburys bastaldy. Ol aýyl mektepterin damytýǵa jáne daryndy balalardy qoldaýǵa jaǵdaı jasaýǵa erekshe kóńil bóldi», dedi shákirti ári áriptesi K.Shámshıdınova.
Ońtústik astanadaǵy lıseıge ustaz esiminiń berilýin kópshilik úlken qýanyshpen qabyldaǵanyn jetkizgen Qazaq KSR halyq aǵartý isiniń úzdigi, Qazaqstannyń Eńbek Eri Aıagúl Mırazova «Shámsha Kópbaıqyzynyń esimi elimizdiń ǵylym, bilim salasymen tyǵyz baılanysty ári qandaı qurmetke bolsa da laıyq. Ustaz eńbegi shákirtteri arqyly elenip jatatyny haq. О́ziniń laýazymyna, qoǵamdaǵy dárejesine qaramastan, qatardaǵy ustazdardyń únine qulaq túrip, olardyń usynys-tilegin tyńdaı bildi. Qoǵamda ustaz mártebesiniń joǵarylaýyna, eńbeginiń elenýine kóp ter tókti», dep atap ótti.
Bolmysy bólek, bitimi erek, dara minezdi, júregi qazaq dep soqqan ultymyzdyń sanaýly qaıratker qyzdarynyń biri Shəmsha Berkimbaeva jaıynda pedagogıka ǵylymdarynyń doktory, Y.Altynsarın atyndaǵy Ulttyq bilim akademııasynyń bas ǵylymı qyzmetkeri Jaýymbaı Qaraev, ulaǵatty ustazdar Roza Kıikbaeva jáne Qýanyshkúl Meńdeıaqova júrekjardy estelikterimen bólisti.
Jıyn ulaǵatty ustaz, qaıratker tulǵaǵa «Qyz-ǵumyr» óleńin arnaǵan aqyn Farıza Ońǵarsynova jáne basqa da avtorlar shyǵarmalarynyń oryndaýyndaǵy taǵylymdy keshpen jalǵasty.
ALMATY