Bıylǵy 1 qazandaǵy esep boıynsha Kásipkerlikti damytý jónindegi 2021-2025 jyldarǵa arnalǵan ulttyq joba sheńberinde óz isin ashýǵa 400 AEK-ke deıingi mólsherdegi granttardy 12,1 myń adam aldy, onyń 7,9 myńy (65,3%) – aýyldyq jerlerdiń turǵyndary.
Bıznesti ashýǵa memleketten qarjylyq qoldaý bólingen azamattar grant alǵan kúnnen bastap úsh aı ishinde óz qyzmetin qoldanystaǵy zańnamaǵa sáıkes salyq organdarynda tirkeýge mindetti. Búgingi tańda kásipkerlik qyzmetti 7 133 adam tirkedi.
Memlekettik grant alýshylar qatarynda jastar arasynan 5 865 adam, kópbalaly otbasylardan 3 580 adam, 1 061 múgedektigi bar adam, 760 múgedektigi bar bala tárbıelep otyrǵan adam, tabysy az otbasylardan 453 adam, 119 ishki qonys aýdarýshylar, 97 asyraýshysynan aıyrylý jaǵdaıy boıynsha áleýmettik járdemaqy alýshylar jáne 15 qandas bar.
Granttar qajetti qural-jabdyqtar men tehnologııalyq jabdyqtardy satyp alýǵa, janýarlardy ósirýge jáne ósimdikterdi ósirýge, sondaı-aq úı-jaılardy jalǵa alýǵa berildi.
2022 jyly halyqtyń áleýmettik osal sanattaryna jatatyn jastar men azamattar úshin 20 myń grant berý josparlanýda. Áleýetti alýshylardy irikteý besinshi lekte júrgiziletin bolady, bul rette tórtinshi lek sheńberinde kandıdattardan ótinimderdi qabyldaý 30 qyrkúıekte aıaqtalǵanyn isterińizge sala keteıik.
Grant alýǵa ótinishterdi qabyldaý týraly habarlandyrý ol bastalǵanǵa deıin kúntizbelik 10 kún buryn Eńbek jáne halyqty áleýmettik qorǵaý mınıstrliginiń, jergilikti atqarýshy jumyspen qamtý organdarynyń jáne qalalar men aýdandardyń halyqty jumyspen qamtý ortalyqtarynyń ınternet-resýrstarynda jarııalanady.
Granttar berýdiń barlyq prosesi elektrondyq formatqa aýystyryldy, memleketten óz isin ashýǵa qarjylyq qoldaý alýǵa ótinimderdi qabyldaý biryńǵaı tereze – Business.enbek.kz portaly arqyly júzege asyrylady.