Búgin «Otandastar qory» men «Zýqa batyr Sábıtuly» qoǵamdyq qory birlesip Qazaqstan Respýblıkasynyń Ulttyq akademııalyq kitaphanasynda Ábdirahman Jálelulynyń «О́mir jolymdaǵy sońǵy kósh» atty ómirbaıandyq kitabynyń tusaýkeseri ótti, dep habarlaıdy Egemen.kz.
HH ǵasyrdyń basynda jáne ortasynda qazaq halqynyń basyna túsken aýyr náýbet, zulmat jyldar týraly aıtylar áńgime az emes. Ásirese, «jumyr jerdiń jotasy» atanǵan Tıbet qyraty - Gımalaı taýynan asqan bosqyn qazaq kóshi adamzat tarıhyna óshpeıtin izi men ómirsheń tańbasyn qaldyrdy.
2022 jyly Altaıdan bastaý alǵan qazaq kóshiniń túbi bir Túrik eline qonys aýdarǵanyna 70 jyl tolyp otyr. Barkól, Tıbet jotasy arqyly Gımalaıdy asqan, Úndistan men Pákistan arqyly Túrkııaǵa jetken aıtýly kóshti kórgen qarııalarymyz da az qaldy. Sonyń biri qaraly kóshtiń tiri kýágeri, qoǵam qaıratkeri - Ábdirahman Jálelulynyń «О́mir jolymdaǵy sońǵy kósh» atty ómirbaıandyq kitaby jaqynda jaryqqa shyqqan.
Is-sharaǵa tarıhshy ǵalymdar, qoǵam qaıratkerleri men buqaralyq aqparat quraldarynyń ókilderi qatysty.
Ábdirahman Jáleluly - áıgili Zýqa batyrdyń nemeresi. 1938 jyly Barkólde dúnıege kelgen atamyz búginde Germanııanyń Kıoln qalasynda turady. Eýropa qazaqtary qaýymdastyǵynyń negizin qalaýshy jáne qurmetti tóraǵasy. Dúnıejúzi qazaqtary qaýymdastyǵynyń eki márte tóralqa múshesi, kórnekti qoǵam qaıratkeri.
Qazaqtyń qıly taǵdyrynan syr shertetin tyń týyndynyń avtory - Altaıdan aýǵan qaraly kóshtiń basy-qasynda bolǵan qaıratker tulǵanyń qatysýymen ótti.