ASTANA. 23 mamyr. Oralda Mánshúk Mámetovanyń murajaı-úıi tonaldy. Qýanyshqa oraı, kúdikti kóp uzamaı quryqtaldy. Bul týraly «24kz» habarlady.
Keńes Odaǵynyń Batyry, qazaqtyń aıaýly qyzy Mánshúk Mámetova turǵan úı qazir murajaıǵa aınalǵan. Munda batyr qyzdyń qoldanǵan zattary, kıim-keshegi jáne basqa da buıymdary saqtaýly tur.
Al osy murajaıdy tún jamylǵan ury tonap ketken. Arnaıy qoıylǵan kúzetshi – murajaı dırektorynyń uly tereń uıqyda bolǵan.
Teksere kele anyqtalǵandaı, murajaıdyń terezesin syndyryp, ishke kirgen ury HIH ǵasyrda shyǵarylǵan «Mosın» vıntovkasy men karabındi, mehanıkalyq patefondy, sondaı-aq, alǵashqy qazaq áskerı bólimin qurǵan Hamıt Chýrınniń rarıtettik bylǵary rýletka-ólsheýishin alǵan. Muny azsynǵan tonaýshy murajaı-úıdegi DVD oınatqyshty da qoltyǵyna qystyra ketken.
Qýanyshqa oraı polıseıler qylmystyń izin sýytpaı ashty.
Oral oblystyq ishki ister departamentiniń baspasóz qyzmetiniń ókili. Asylaı Ǵubasheva: «Shuǵyl sharalar qabyldap, ınnovasııalyq tehnologııany qoldanýdyń nátıjesinde qylmys 4 saǵattyń ishinde ashyldy. Jedel basqarý ortalyǵynyń jáne sol mańdaǵy uıymdardyń aldyndaǵy beınebaqylaý kameralaryndaǵy jazbalardy qaraý nátıjesinde kúdiktiniń túr kelbeti men barǵan jerleri anyqtaldy. Al krımınaldyq polısııa qyzmetkerleri urlanǵan qundy jádigerlerdi taýyp, murajaıǵa qaıtaryp berdi» – dedi.
Kúdikti buǵan deıin de 5 ret urlyǵy úshin isti bolǵan 25 jastaǵy azamat ekin.
Mánshúk Mámetovanyń memorıaldyq murajaı úıiniń dırektory Svetlana Bektenova: «Oqys jaǵdaı bolǵanda, polısııaǵa habar beretin arnaıy dabyl qondyrǵysyn ornatýǵa qarajat joq. Sondyqtan kúzetshiniń qyzmetin paıdalanamyz. Al tonaýshymen betpe-bet kelgen jaǵdaıda, qylmyskerdiń olardy da aıamaıtyny anyq. Eshkimniń japa shekpegenine shúkir dep otyrmyz. Endi terezege tor ornatyp, qaýipsizdikti kúsheıtemiz», – dedi.
Joldybaı Bazar.
Derekkóz: «24kz».
Foto: «24kz».