Aqtóbe oblysynda 426 mektep bolsa, olardyń teń jartysy eldi mekenderde ornalasqan. Jahandyq ózgerister bilim salasyn da aınalyp ótpegen qazirgi tusta aýyl mektepteri men qala mektepteriniń arasyndaǵy bilim aıyrmashylyǵyn joıý artyqshylyq berilgen baǵyttardyń birine aınaldy. О́ıtkeni jylma-jyl aýyl mektepteriniń oqýshylary men qala oqýshylary arasynda bilim alshaqtyǵy ulǵaıyp barady.
Osy olqylyqtyń ornyn toltyrý úshin Aqtóbe qalasyna jaqyn aýdandardyń turǵyndary 10-11 synypta oqıtyn balalaryna qaladan repetıtorlyq ortalyqtar izdep, ábigerge túsedi. Kúndelikti qalaǵa qatynaýǵa kóp ata-ananyń shamasy jete bermeıtini de belgili. Bilim UBT tapsyrýǵa ǵana emes, júıeli bolýy kerek. Aýyldyq jerlerdegi bilim sapasyn kóterýde eń aldymen joǵary jyldamdyqtaǵy ınternet baılanysyn jolǵa qoıý kún tártibinde tur. Zamanaýı bilimge qol jetkizý úshin biryńǵaı mektep oqýlyqtarymen daıarlaný jetkiliksiz ekenin ustazdar da, oqýshylar men olardyń ata-analary da jaqsy túsinedi. Sondyqtan qaǵazǵa basylǵan oqýlyqtardaǵy aqparattan ózge taqyrypty túsiný maqsatynda oqýshylardyń qosymsha aqparat alýy, málimetterdi saralaýy men taldaı alýy, synı oılaý qabiletin jetildire bilýi óte mańyzdy.
Elimizde qala men aýyl mektepteriniń arasyndaǵy bilim alshaqtyǵyn joıý maqsatynda NIS mektepteri 17 óńirdegi 17 mektepke ádistemelik qoldaý kórsetý jobasyn bastady. Solardyń qatarynda Alǵa aýdanynyń Bestamaq orta mektebi «Aýyldyq jerdegi tirek mektepterdiń áleýetin damytý» jobasy boıynsha Aqtóbedegi NIS-tiń tirek mektebi bolyp bekitildi. Aýqymdy jumys zııatkerlik jáne Bestamaq orta mektepteriniń dırektorlary Sáýle О́mirbekova men Anar Isteǵulovanyń kezdesýinen bastaldy. Bir apta ishinde NIS muǵalimderi búkil pedagogıkalyq ujymǵa ashyq sabaqtar, semınarlar, sheberlik sabaqtar men trenıngter ótkizdi. Bestamaqtyq muǵalimder jaratylystaný-matematıka jáne áleýmettik-gýmanıtarlyq ǵylymdar, geografııa, tarıh, óner, dene shynyqtyrý, robottehnıka jáne ınformatıka pánderi boıynsha dáristerge qatysyp, kitaphana men úıirmelerdiń jumysymen tanysty. Sondaı-aq NIS oqytýshylary oqý prosesinde tik jáne kóldeneń josparlaýdy uıymdastyrýdyń tásilderin kórsetti. Bestamaq mektebiniń oqytýshylary osyndaı shyǵarmashylyq baılanystyń tıimdiligin atap ótti.
– Zııatkerlik mektep muǵalimderiniń sabaq josparlaýdaǵy zertteýshilikke mán berýi, osy baǵytty túrlishe damytý sheberlikteri, oqýshylardyń shyǵarmashylyq qabiletin ashýdaǵy jumys baǵyttary unady. Bul – biz úshin úlken tájirıbe almasý, – deıdi Bestamaq orta mektebi tarıh pániniń muǵalimi Roza Dúısenbaeva.
Aıta ketý kerek, «Aýyldyq jerdegi tirek mektepterdiń áleýetin damytý» jobasyn NIS Bilim berýdi turaqty damytý qory jáne «Qazaqstan halqyna» qorymen birlesip iske asyrýda. Biraz ýaqyt buryn Aqtóbedegi NIS ustazdarynan quralǵan top Bestamaq mektebine kelip, «Aýyldyq jerdegi tirek mektepterdiń áleýetin damytý» baǵdarlamasymen áriptestik baılanys ornatýǵa ózderi usynys etken. NIS muǵalimderi kúndelikti pándik sabaqtarynan soń joba qatysýshylarymen sabaqtyń ótkizilýine taldaý jasap, tyńdaýshylardyń syn-eskertpelerin jáne usynystaryn surady. Tańdaýly bilim oshaǵynyń aýyl mektebine qanshalyqty áser etkenin osy oqý jylynyń sońynda mektep oqýshylarynyń sabaq úlgerimi men UBT qorytyndysy boıynsha anyqtaýǵa bolady. Aqtóbedegi NIS muǵalimderi Bestamaq mektebin úsh jyl boıy ádistemelik turǵydan qamtamasyz etedi. Bul eki jaqqa da paıdaly ári túpkilikti nátıjesi – tirek aýyldaǵy bilim sapasynyń artýyna oń áser etpek.
Aqtóbe oblysy