Bala tárbıesinde jibergen ıneniń jasýyndaı olqylyqtyń ózi orny tolmaıtyn aýyr jaǵdaıǵa aparyp soǵatyny anyq. О́kinishke qaraı, qoǵam jasóspirimder arasyndaǵy qaıǵyly oqıǵalardyń jolyn kesýge qaýqarsyz. Ásirese balalar arasyndaǵy sýısıdtiń azaımaı otyrýy – osynyń aıǵaǵy.
Jamanat habardy jasyryp qalýǵa bolmas, jaqynda Talǵar aýdanyna qarasty Jalǵamys aýyldyq orta mektebiniń 10-synyp oqýshysy ózine qol jumsap, ómirmen qoshtasty. Aýyl adamdaryn dúrliktergen jaǵdaıdy oblystyq bilim basqarmasynyń ókilderi rastaǵanymen, qyz balanyń sýısıd jasaý sebebin syrt kózge jarııa etpedi. Al turǵyndar qaıǵyly oqıǵa mektep aýmaǵynda bolǵan deıdi.
– Talǵar aýdanynyń Jalǵamys aýylynda mektep oqýshysy sýısıd jasaǵany rastaldy. Qaıǵyly oqıǵa sabaqtan tys ýaqytta bolǵan. Qaıtys bolǵan oqýshynyń otbasyna qaıǵyryp kóńil aıtamyz. Bilim basqarmasy qajetti kómek kórsetedi. Qazirgi ýaqytta quqyq qorǵaý organdary tergeý sharalaryn júrgizip jatyr, – deıdi oqıǵaǵa oraı aqparat taratqan oblystyq bilim basqarmasynyń baspasóz qyzmeti.
Rasymen, Almaty oblysyndaǵy jasóspirimderdiń jaǵdaıyna alańdaýǵa negiz bar sııaqty. О́ıtkeni balalardyń ózine qol jumsaý derekteri kóbeıip otyr. Mysaly, aımaqta ótken alty aıda 7 bala óz-ózine qol jumsap, ómirimen qoshtasqan bolatyn. Qyrshynnan qıylǵan jeti jas ǵumyrdyń ekeýi Eńbekshiqazaq aýdanynda, ekeýi Uıǵyr aýdanynda turǵan bolsa, Jambyl, Ile jáne Qarasaı aýdandarynda bir-bir oqıǵadan tirkelgen eken. Al ózine qol salýǵa oqtalǵan 11 bala qutqarylypty. Al Talǵar aýdanynda bolǵan oqıǵanyń jaı-japsaryn tergeý anyqtaı jatar.
Jalpy, bala óliminiń sany artqanyn da jasyrýǵa bolmas. Taǵy bir qaıǵyly oqıǵa jaqynda ǵana Ile aýdanynyń Ashybulaq aýylyna qarasty «Jomart» saıajaıynda boldy. Bul rette bir otbasynyń 3 balasy gazǵa ýlanyp qaıtys bolǵan. Oblystyq tótenshe jaǵdaı qyzmeti «Jomart» saıajaıynda bir otbasynyń gazdan ýlanǵanyn habarlady. Oqıǵa ornynan 52 jastaǵy er adam men onyń úsh uly tabylǵan. Jan tapsyrǵan balalardyń úlkeni 13 jasta, ekeýi 8 jasta eken.
О́kinishke qaraı, jol apatynan zardap shekken bala sany da artyp otyr. Eń aýyry, apat saldarynan til tartpaı ketken balalar da bar. Aımaqta jyl basynan beri jasóspirimderdiń qatysýymen 207 jol apaty bolyp, 9 bala qaza bolǵan kórinedi. Taǵy 300 bala ártúrli dene jaraqatyn alǵan. Kúni keshe Qarasaı aýdanynda 14 jastaǵy 2 oqýshy mopedpen gaz qubyryna soǵylyp, bireýi qaıtys boldy.
– Aldyn ala málimetter boıynsha 14 jastaǵy jasóspirim motosıkldi basqara almaı, gaz qubyryna soǵylǵan. Oqıǵa ornynda kámeletke tolmaǵan júrgizýshi qaza taýyp, onyń synyptasy aýrýhanaǵa jetkizildi, – dep habarlaıdy oblystyq polısııa departamentiniń baspasóz qyzmeti.
Almaty oblysy