Abaı oblysyndaǵy kóne oqý oryndarynyń biri, kezinde Alash ardaqtylary bilim alyp, qyzmet etken Muhtar Áýezov atyndaǵy pedagogıkalyq kolledjiniń kóp jyldan beri qordalanǵan máselesi sheshilýge jaqyn. On jeti jyldan beri kolledjdiń ınjenerlik ınfraqurylymyn shahardyń ortalyqtandyrylǵan jylý júıesine qosý muńǵa aınalǵan edi.
О́zekti máseleni Abaı obly-synyń ákimdigi nazarǵa alyp, aldaǵy ýaqytta bilim ordasy qalanyń jylý jelisine qosylatyn boldy. Bul týraly atalǵan pedagogıkalyq kolledjdiń dırektory Shaǵangúl Janaeva habarlady.
Jalpy, oqý ornynyń ákimshiligi kolledjdiń jylý qazandyǵyn ortalyqtandyrylǵan jylý júıesine qosý máselesin on jeti jyldan astam ýaqyt qala ákimshiliginiń aldynda kóterip keldi. Bul sheshimin tappaǵan, ábden «tıtyqtatqan» másele edi. Ortalyqta ornalasqan jylý qazandyǵy qalanyń ekologııasyna, ult ulylarynyń izi qalǵan tarıhı ǵımarattyń saqtalýyna orasan zor zııan keltirip keledi.
Abaı oblysyna Nurlan Uranhaev ákim bolyp taǵaıyndalǵannan keıin qyzmetin qaladaǵy tehnıkalyq jáne kásiptik bilim berý uıymdarynyń jumysymen tanysýdy, onyń ishinde 119 jyldyq tarıhy bar atalǵan kolledjden bastady. Sol kezdesýde Nurlan Telmanuly oqý ornynyń barlyq sheshimin kútken máselesin nazarǵa alyp, oryndalýyn baqylaýyna alatynyn aıtqan bolatyn.
«Oblys ákimi ýádesine berik eken. Tizimde turǵan ótinishterimiz birden sheshile bastady. Rıza boldyq. Kóńilimizde júrgen, sheshimin kútken kóp másele oryndalyp jatyr. 1987 jyly M.Áýezovtiń 90 jyldyǵynda salynǵan ǵımaratymyzda bar-joǵy 100-aq oryndyq májilis zaly, 400 orynǵa arnalǵan kıimilgishimiz bar. Qazir oqý ornynda 1 500-deı stýdent bilim alyp jatyr. Aýqymdy mádenı sharalardy ótkizýde, alty aı qysta stýdentterdiń kıimin ornalastyrýda qatty qınalatynbyz», deıdi Sh.Janaeva.
Oqý ornynyń basshysy aıtqandaı, kolledjdiń jylý qazandyǵy qalanyń ortalyqtandyrylǵan jylý júıesine qosylǵan jaǵdaıda, ornyna májilis zaly men kıimilgish, basqa da qosalqy qajetti kabınetter qamtylǵan eki qabatty zamanaýı ǵımarat salynady.
«Osy jobanyń daıyndalýyna aıryqsha kóńil bólgen Abaı oblysynyń ákimi Nurlan Telmanulyna rızashylyǵymyzdy bildiremiz. Ákimniń ulylardyń bilim uıasy sanalatyn kolledjdiń tarıhyna qurmeti – elimizdiń tarıhyna qurmeti! Oblys bolyp qurylǵannan beri 3-4 aıda qalada qanshama ózgeris bolyp jatyr. Kóńilimiz ósip júr! Jolymyz da saırap, baǵymyz da jaınap, qalamyz shýaqty nurǵa bólenip kele jatyr!», dedi pedagogıkalyq kolledjdiń dırektory.
Taıaýda Memleket basshysy Abaı oblysyna jasaǵan saparynda atalǵan kolledjdiń jumysymen tanysyp, oqý ornynyń tarıhy men jetistikterine, bilim ordasynan bilim alǵan uly tulǵalardyń ómirine arnalǵan kórmeni aralap, oqytýshylar ujymy jáne stýdenttermen pikir almasqan bolatyn.
«Ustaz degen – qasıetti mamandyq. Bárimiz ustazdy syılaımyz. Sebebi ustaz – joǵary deńgeıdegi tulǵa. Balalarǵa laıyqty bilim berilip jatyr. Bilimsiz adam qaýqarsyz dep aıtýǵa bolady. Qaýqarsyz adam qazirgi básekege toly álemde qalaı ómir súredi? Sondyqtan jas mamandarǵa men rızamyn. О́zderińiz sııaqty jastardy memleket te árqashan qoldaıdy», degen edi Q.Toqaev.
Sondaı-aq Prezıdent elimizde jastarǵa jaǵdaı jasaý úshin biraz reforma júzege asyrylyp jatqanyn da jetkizgen-di.
SEMEI