Mádenıet jáne sport mınıstrligi sheteldik baspalarmen qazaqstandyq jazýshylar men aqyndardyń eńbekterin aýdarý jáne taratý baǵytynda kelissózder júrgizýde. Qol jetkizilgen ýaǵdalastyqtar týraly Frankfýrt halyqaralyq kitap jármeńkesi barysynda belgili boldy. Oǵan atalǵan mınıstrlik quramyndaǵy Muraǵat isteri jáne qujattamany basqarý komıtetiniń tóraǵasy Qýat Borash qatysty.
Atalǵan jármeńke álemniń 85 elinen myńǵa jýyq jazýshy, aqyn, dramatýrgterin jınaǵan kitap shyǵarý isindegi basty oqıǵalardyń biri bolyp otyr. Mádenı is-shara aıasynda iskerlik kezdesýler, dóńgelek ústelder, konsertter jáne t.b. memleketaralyq jıyndar ótedi.
«Búginde qazaqstandyq ádebıet jahandyq keńistiktiń ajyramas bir bóligine aınaldy jáne onda mańyzdy oryn alady. Jazýshylarymyzdyń arqasynda álemniń kóptegen elindegi azamattardyń barynsha keń aýqymyna bizdiń baı tarıhymyz ben máýeli mádenıetimiz týraly aıtyp berýdiń biregeı múmkindigi bar. Sonymen qatar bizdiń mindetimiz – klassıkterimizdi de, qazirgi avtorlarymyzdy da Eýropa men Azııa naryǵyna shyǵarý. Sondyqtan búgin biz otandyq ádebıetti álemniń tanymal tilderine aýdarý jáne ilgeriletý boıynsha jetekshi baspalarmen kelissózder júrgizip jatyrmyz», dedi Qýat Borash.
Aıta keteıik, jyl saıyn jármeńkege álemniń 100 elinen 7 myńǵa jýyq baspa, 275 myńnan astam adam qatysady, onyń jumysy aıasynda 4 myńnan astam is-shara ótkiziledi.