Memleket basshysy «Azattyq Qazaqstanǵa kezdeısoq buıyrdy, elimiz táýelsizdigin eń sońǵy bolyp jarııalady» degen tujyrymǵa qatysty pikir bildirdi, dep habarlaıdy Egemen.kz.
«Qazaqta «Egemen bolmaı, el bolmas» degen tereń maǵynaly sóz bar. Keıde «Azattyq Qazaqstanǵa kezdeısoq buıyrdy, elimiz táýelsizdigin eń sońǵy bolyp jarııalady» degen birjaqty, ústirt tujyrymdar aıtylyp qalatyny jasyryn emes. Bul – sol kezdegi jaǵdaıdy durys baǵamdaı almaǵan adamdardyń sózi», dedi Memleket basshysy.
Sonymen qatar egemendikke bastaıtyn qasıetti joldy halqymyz uzaq jyldar boıy júrip ótkenin eske saldy.
«El aǵalary jáne zııalylar ulttyń sanasyn saqtaý úshin qolynan kelgenniń bárin jasady. Eldiń rýhyn kóteretin astarly kórkem shyǵarmalar jaryq kórdi. Ultymyzdyń azattyqqa degen umtylysy Jeltoqsan oqıǵasy kezinde aıqyn kórindi», dedi Qasym-Jomart Toqaev.