Palata Tóraǵasy Máýlen Áshimbaev is-sharaǵa qatysýshylardy ulttyq merekemen quttyqtap, 1990 jyly 25 qazanda qabyldanǵan Egemendik týraly deklarasııanyń tarıhı mańyzyna toqtalyp ótti. Sondaı-aq ol elimizde júrgizilip jatqan reformalarǵa nazar aýdardy, dep habarlaıdy Egemen.kz Senattyń baspaóz qyzmetine silteme jasap.
«Memleket basshysy Qasym-Jomart Kemeluly Toqaevtyń bastamasymen elimizde aýqymdy saıası, áleýmettik-ekonomıkalyq reformalar júrgizilip jatyr. Olardyń barlyǵy ádiletti Qazaqstan qurý qaǵıdasyna taban tireıdi. Respýblıka kúniniń ulttyq mereke retinde qaıtarylýy da ádilettilik qaǵıdatynyń jarqyn kórinisi ekeni sózsiz. Osyndaı aýqymdy jumystardyń aıasynda Parlament eldegi tarıhı sheshimderdi zańnamalyq turǵydan qamtamasyz etetin birqatar mańyzdy zań qabyldaýda. Bul rette Senat depýtattarynyń jáne Apparat qyzmetkerleriniń eńbegin erekshe atap ótken jón», dedi Máýlen Áshimbaev.
Is-shara barysynda Senat Tóraǵasy senatorlarǵa, Apparat qyzmetkerlerine, sondaı-aq, Álemdik jáne dástúrli dinder lıderleriniń VII Sezin joǵary deńgeıde ótkizýge úles qosqan belsendi azamattarǵa Memleket basshysynyń Jarlyǵymen bekitilgen memlekettik nagradalardy saltanatty túrde tapsyrdy.
«Parasat» ordenimen Senat Vıse-Spıkeri Olga Perepechına, depýtattar Rysqalı Ábdikerov, Baýyrjan Qanıev, Dúısenǵazy Mýsın jáne Lázzat Súleımen nagradtaldy.
Senat Apparatynyń qyzmetkerleri qatarynda bólim meńgerýshisi Baqyt Aǵısa «Qurmet» ordenimen, bólim meńgerýshileri Baqytgúl Tóleýova, Nurbek Almashov, bólim meńgerýshileriniń orynbasarlary Sholpan Beısembekova, Qarashash Ismaılova, Gúlsana Tólepbergenova jáne Janar Tólendınova «Eren eńbegi úshin» medalimen marapattaldy.
Álemdik jáne dástúrli dinder lıderleriniń VII Sezin uıymdastyrýǵa jáne ótkizýge aıryqsha úles qosqany úshin Konfessııaaralyq jáne órkenıetaralyq dıalogty damytý jónindegi N.Nazarbaev ortalyǵynyń Basqarma tóraǵasy Bolat Sársenbaev «Parasat» ordenimen, atalǵan Ortalyqtyń Basqarma tóraǵasynyń orynbasary Dıana Esenova jáne «Astana Venue Management» JShS-nyń bas dırektory Málik Hasenov «Eren eńbegi úshin» medalimen nagradtaldy. Sondaı-aq Álemdik jáne dástúrli dinder lıderleri VII Seziniń resmı ókili Nazym Janǵazınova «Shapaǵat» medalimen marapattaldy.
Senat Apparaty qyzmetkerleri – bólim meńgerýshisiniń orynbasary Vadım Súleımenovke jáne bas konsýltant Ásel Ertasqa Qazaqstan Respýblıkasynyń Qurmet gramotasy tapsyryldy.
Sonymen qatar saltanatty jıynda birqatar Senat depýtaty men Apparat qyzmetkeri TMD Parlamentaralyq Assambleıasynyń «MPA SNG 30 let» mereıtoılyq medalimen nagradtaldy.