Qandaı zaman bolsyn, halqymyz qanyna sińgen, bolmysyna bitken sharapatshyl, meıirban sııaqty asyl qasıetinen ajyrap qalmaǵanyna búgingi kúnimizden de kóptep mysal keltirýge bolady. Aramyzda osyndaı keńpeıildigimizdi is júzinde izgi amaldarymen kórsetip júrgen azamattar barshylyq. Olardyń qaıyrly isteri qoǵam tarapynan ataýsyz qalǵan emes. Osy oraıda halyq alǵysyn arqalaǵan úzdik mesenattar men fılantroptar Astananyń tórinde «Jomart júrek» respýblıkalyq syılyǵymen marapattaldy.
Qazaqstanda qaıyrymdylyq jasaý men ony damytýǵa eleýli úles qosqan qaıyrymdylyq jasaýshylardy eskerýsiz qaldyrmaý jáne yntalandyrý, olarǵa qoǵamnyń nazaryn aýdarý maqsatynda Aqparat jáne qoǵamdyq damý mınıstrligi 2018 jyldan «Jomart júrek» syılyǵyn tabystap keledi. Bul rette bıylǵy konkýrsqa 17 oblys pen respýblıkalyq mańyzy bar qalalardyń ókilderi qatysty. Konkýrs jeńimpazdary – onlaın-daýys berý qorytyndysy boıynsha halyq tańdaǵan 50 adam «Jyl tulǵasy», «Jyl mesenaty», «Týǵan ólke», «Jyldyń úzdik uıymy» jáne «Jyldyń úzdik qamqorshysy» dep atalatyn 5 nomınasııa boıynsha anyqtaldy.
Marapattaý rásimine Parlament Májilisiniń depýtattary, bıznes salasynyń, qaıyrymdylyq jáne eriktiler uıymdarynyń ókilderi qatysty. Alqaly jıynda Aqparat jáne qoǵamdyq damý mınıstri Darhan Qydyráliniń baıqaý jeńimpazdaryna arnaǵan aqjarma lebizin atalǵan sala vıse-mınıstri D.Qadyrov jetkizdi.
«Jomart júrek» syılyǵynyń 50 jeńimpazynyń árqaısysy óz aýylyn, qalasyn damytýǵa zor úles qosyp, muqtaj jandarǵa kómektesken. Atap aıtsaq, «Jyl tulǵasy» nomınasııasy boıynsha qaıyrymdylyq qyzmeti úshin marapatqa ıe bolǵandardyń arasynda aýyl mektepteri men balabaqshalarǵa demeýshilik kómek kórsetip júrgen Qyzylorda oblysynyń «Er-Álı» sharýa qojalyǵynyń basshysy Álibı Bekjanov bar. Onyń demeýshiligimen A.Ońalbaev atyndaǵy №117 orta mektebiniń sport zaly men aýyldyq mádenıet úıinde 220 oryndyq kórermender zaly ashylǵan. Maqpalkól aýylynda demeýshilikpen az qamtylǵan otbasylarǵa arnalǵan 4 úı salyndy.
Al «Jyl mesenaty» nomınasııasy boıynsha Túrkistan oblysynyń atynan qatysqan «Kúltóbe» JShS dırektory Sháripbek Saýryqov Aqtas aýyly men Báıdibek aýdany Shybyt eldi mekeniniń muqtaj otbasylaryna turǵyn úı salýǵa qarajat bólgen. Shaıan aýyldyq okrýgindegi Shaıan aýylynyń múmkindigi shekteýli otbasylary men muqtaj turǵyndaryna turǵyn úı salýǵa qarajat bólýmen qatar, osy aýyldyń az qamtylǵan otbasylaryna turaqty túrde azyq-túlik jáne qarjylyq kómek kórsetip turady.
Týǵan jerdi qoldaý boıynsha áleýmettik mańyzdy jobalardy júzege asyrǵany úshin «Týǵan ólke» nomınasııasymen marapattalǵandardyń ishinde Aqtóbe oblysynyń «Dınar-Elektromash» JShS dırektory Sergeı Vıshnıak bar. Ol mádenıet, bilim jáne sport mekemelerine turaqty kómek kórsetip keledi. Aqjar kentinde ınfraqurylymdy uıymdastyrýǵa jáne Jańaqonys kentinde kógaldandyrý úshin demeýshilik kómek kórsetildi. 150 múgedek janǵa azyq-túlik paketteri túrinde kómek berip, 5 adamnyń ońaltý-emdelýi úshin jaǵdaı jasaldy. Balalardy ońaltý ortalyǵynyń materıaldyq-tehnıkalyq bazasyn jaqsartý úshin demeýshilik kórsetti.
«Jyldyń úzdik qamqorshysy» atalǵan jeńimpazdyń biri – Aqmola oblysynyń «Balbóbek 2014» JShS basshysy Janar Naýhanqyzy Hasenova. Ol keshendi qaıyrymdylyq qyzmeti men eleýli áleýmettik-mańyzdy ózgerister jasaǵany úshin jeńimpaz atanǵan. Kópbalaly otbasylardan shyqqan 10 balany balabaqshaǵa tegin barýǵa demeýshilik kómek kórsetken, az qamtylǵan, kópbalaly otbasylarǵa jáne múmkindigi shekteýli adamdarǵa qarjylyq qoldaý jasaǵan «balbóbektikter» túrli merekelik is-sharalardy óteýsiz uıymdastyrýǵa uıytqy bolyp keledi.
Jalpy, qoǵamda mundaı mysaldar kóptep sanalady. Barlyq laýreatqa estelik syılyqtar men dıplomdar tabys etildi.