Qaraǵandyda «Armanǵa jol - 2022» jartylaı marafony eldiń ár túkpirinen jelmen jarysyp júrgen jelaıaqtardy jınady. Respýblıka kúnine arnalǵan shara, tipti halyqaralyq sıpat ıelendi. Kúzdiń dymqyl kúnine qaramastan 3 myń adamnyń júgirýge ynta bildirýi marafonnyń aýqymyn ańǵartsa kerek. Elimizdiń óńirlerin aıtpaǵanda, Reseı, Qyrǵyzstan, О́zbekstan jelaıaqtarynyń at terletip arnaıy kelýi marafon salmaǵyn arttyra túsken-di.
– Búgin jartylaı marafonǵa Reseı, Qyrǵyzstan jáne О́zbekstannan qatysýshylar bar. Syrttan qatysýshylardyń barlyǵy derlik 21 shaqyrym qashyqtyqtaǵy júgirýge ótinish berdi. 21 shaqyrymǵa 163 qatysýshy tirkeldi. Buǵan deıingi marafonda bul qashyqtyqta júgiretinder sany 60 shamasynda edi. Al qazir kóbeıgenin kórip otyrmyz. Azamattardyń sportqa kóptep den qoıýy qýantady, – deıdi oblys ákiminiń orynbasary Erbol Áliqulov.
Oblystyq jeńil atletıka olımpıadalyq rezerviniń mamandandyrylǵan balalar men jasóspirimder mektebiniń basshysy Nurlan Túsipovtiń aıtýynsha, marafonǵa barlyǵy 3 600 adam tirkelgen. Degenmen marafonda 3000 nomer taratylǵan. Aýa raıynyń kúrt sýytýy da buǵan yqpal etse kerek. Qatysýshylardyń jasyna kelsek, eń úlkeni 80-nen assa, eń kishisi 8 jasta.
Sonymen tańerteń saǵat 10-da Qaraǵandyda ortalyq kósheler avtokólik qozǵalysyna jabylyp, jelaıaqtarǵa jol bosatyldy. Táýelsizdik alańynda marafonnyń ashylýy ótip, marafondy 8-13 jas aralyǵyndaǵy balalar bastady. Olar eki shaqyrymdy «Balapan» qashyqtyǵyn 20 mınýtta baǵyndyrdy. Uldar arasynda birinshi oryndy qaraǵandylyq Vıtalıı Krasıkov, qyzdar arasynda Sabına Kryshkına aldy. Ekinshi oryndy Shyǵys Qazaqstannan kelgen Dmıtrıı Spassk pen astanalyq Medına Maquljanova bólisti.
Jalpy, marafon tórt qashyqtyqtan turdy. Onyń eń bastysy – «Armanǵa jol» – 21 shaqyrym. Marafonda bul qashyqtyqtyń máre syzyǵyn erler arasynda Reseıdiń Omsk qalasynan kelgen Mıhaıl Kýlıkov birinshi bolyp kesti. Áıelder arasynda qostanaılyq Tatıana Neroznak jeńimpaz atandy. Jeńimpazdar 350 000 teńgeniń sertıfıkatymen marapattaldy. Ekinshi jáne úshinshi oryn Almaty, Astana, Aqtóbe jelaıaqtaryna buıyrdy. Túrli qashyqtyqtaǵy marafon 4 saǵatqa sozyldy.
– Búgin myqty júgirýshiler, marafon jáne jartylaı marafon jeńimpazdary jınaldy. Olardyń qatarynda byltyrǵy jartylaı marafonnyń jeńimpazy atanǵan almatylyq ta bar. «Armanǵa jol»-dan basqa qashyqtyqqa júgirý tegin. Biz mıllıon teńgeden astam qarjy jınadyq. Qarajat qaıyrymdylyqqa jumsalady. 50% – serebraldy sal aýrýyna shaldyqqan balalardy emdeýge, 5 % – bilim berýge baǵyttalady, – deıdi jartylaı marafonnyń uıymdastyrýshysy Rýslan Iskakov.
Pavlodardan arnaıy kelgen Freedom Team júgirý klýbynyń quramynda 20 adam. Marafonnyń halyqty biriktirýdegi yqpalyn erekshe ataıdy klýb jetekshisi.
– Biz 20 adambyz. Úlkenimiz 43-te, kishisi 23-te. Barlyq jastaǵylar júgirýge qabiletti. Bul – bárimizdi biriktiretin, tán men jandy sergitetin sport túri, – deıdi klýb jetekshisi Bolat Ordabaev.
Sondaı-aq marafonǵa qatysýǵa otbasymen kelgender qatarynda qaraǵandylyq Janaıdar Zekenov te bar. Janaıdar óziniń marafonǵa turaqty qatysýshy ekenin, otbasymen salaýatty ómir saltyn ustanatynyn, balalaryn da soǵan tárbıeleıtinin aıtady.
– Marafondardyń turaqty qatysýshysymyn. 14 shaqyrymdyq qashyqtyqqa júgiremin. Biz búkil otbasymyzben keldik marafonǵa. Qyzdarym Aıjan men Aınagúl ekinshi ret júgiredi, – deıdi Janaıdar Zekenov.
76 jastaǵy aqsaqal Serik Ábishev jartylaı marafonǵa tórtinshi ret qatysqan eken. Aqsaqaldyń aıtýynsha, otbasy túgel sportqa beıim. Júgirýden aldaryna jan salmaıdy. Qarııa barsha jurtty sportpen aınalysýǵa shaqyrady.
– Uıymdastyrýshylardyń túrli qashyqtyqty usynǵany jaqsy. Men «Dostyq» jarysynda júgiremin. Búkil otbasym júgirýge den qoıǵan. Marafondarǵa balalar da, nemereler de qatysady. Qazaqstandyqtardy sportpen shuǵyldanýǵa shaqyramyn, – deıdi Serik Ábishev.
Qaraǵandy oblysy