Senator Andreı Lýkın memlekettik aýdıt komıtetiniń jumysyn synady, atap aıtqanda, olardyń tıimsiz jáne nátıjesiz tekserý júrgizgenine toqtaldy. Bul týraly ol elimizdiń Premer-Mınıstriniń atyna depýtattyq saýalynda jarııa etti, dep habarlaıdy Egemen.kz.
Senatordyń aıtýynsha, aýdıtorlar ári jylda birdeı jáne qaıtalana beretin zań buzylýyn tirkep keledi. Jumystyń tıisti deńgeıde júrgizilmeýine baılanysty birqatar tekserý nátıjesiz aıaqtaldy.
«Atap aıtqanda, josparlanǵan 82 sharanyń 28-i nemese 34% astam jyldyq tizimge negizsiz engizilgen bolyp shyqty. Soǵan qaraǵanda tekserilgen jekelegen mınıstrlikterde eshqandaı qaýip deńgeıi joq. Jumystyń durys uıymdastyrylmaýynyń saldarynan birqatar tekserýdiń nátıjesi tómen ári tıimsiz bolyp shyqty», dep atap ótti Andreı Lýkın.
Senator sonymen qatar kameralyq baqylaý júrgizý máselesin kóterdi. Senatordyń aqparaty boıynsha aýmaqtyq departamentter baqylaýdyń bul túrin júrgizgen joq, degenmen jalpy somasy 300 mlrd teńgeden astam 3 myńnan joǵary memlekettik satyp alý rásimi bolýy tıis edi. Tipti ótkizilgen jaǵdaılarda da, sheneýnikter kóbinese shartty jeńildikterdi ózderi esepteıdi, ıaǵnı sheshim tekserýshiniń sýbektıvti pikirine baılanysty bolady. Sonymen qatar aýdıtorlar jekelegen jaǵdaılarda qylmystyq quqyq buzýshylyqtardyń aıqyn belgileri bolǵan kezde materıaldardy quqyq qorǵaý organdaryna jibermeıdi jáne ákimshilik yqpal etý sharalaryn qoldanbaıdy.
Senator osyǵan baılanysty aýdıtorlardyń jumysyn jaqsartý men bıýdjet qarjysyn, memleket jáne kvazımemlekettik sektor aktıvterin basqarý men paıdalanýdyń tıimdiligin arttyrý jóninde birqatar usynys aıtty.
«Táýekelderdi basqarý júıesiniń ólshemderi men memlekettik aýdıt obektilerin irikteý tártibin qaıta qaraýdy, salalyq buıryqtardy oryndalýdaǵy mindettilik jónindegi talaptardy qatań saqtaýdy, kameralyq baqylaý júrgizý kezinde memlekettik satyp alý týraly zańnama erejelerin birkelki qoldanýdyń ádisnamalyq negizin ázirleýdi, shyǵys operasııalaryn toqtata turý týraly ókimderdi shyǵarý jáne joıý prosesindegi adamı faktordy aqparattyq júıe arqyly avtomatty túrde alyp tastaýdy usynamyn», dedi senator.