«Aqorda» rezıdensııasynda Memleket basshysy Qasym-Jomart Toqaev pen Eýropalyq Keńes Prezıdenti Sharl Mıshelge Mańǵystaý oblysynda «jasyl» sýtegin óndirý jáne taratý ortalyǵyn qurý jobasy tanystyryldy, dep habarlaıdy Egemen.kz.
Investor Svevind Group kompanııasy Mańǵystaý oblysynda qýaty jylyna 2 mıllıon tonna bolatyn «jasyl» sýtegi óndirisin qolǵa alýdy josparlap otyr. Joba boıynsha táýligine qýaty 255 myń tekshe metr sý tushytatyn qondyrǵy, 40 GVt jańartylatyn energııa stansııasyn (jel, kún) jáne negizinen eksportqa nemese ishki naryqta tutynýǵa arnalǵan 20 GVt sý elektrolızi óndirisin salý ári paıdalaný kózdelip otyr.
Atalǵan jobany júzege asyrý barysynda, qurylys kezeńinde shamamen 3500, nysandardy kezeń-kezeńimen iske qosý kezinde 1800-ge jýyq jańa turaqty jumys orny ashylýy múmkin. Sondaı-aq Mańǵystaý oblysynda maman daıarlaý úshin Germanııa men Qazaqstannyń joǵary oqý oryndary arasynda yntymaqtastyq ornatý qarastyrylǵan.
Budan bólek, ınvestor esebinen ınfraqurylymdar salý jáne óńirdiń áleýmettik-ekonomıkalyq damýyna áleýmettik mindettemeler tóleý josparlanyp otyr.