Abaı oblysynda Respýblıka kúnine oraı páter kiltteri berilip, sporttyq-mádenı nysandar ashyldy. Sondaı-aq aǵash kóshetteri egilip, óńirdiń jasyl beldeýin ulǵaıtýǵa baılanysty jumystar qolǵa alyndy.
Aldymen Semeıdegi aspaly kópirdiń mańyndaǵy qoǵamdyq keńistiktiń janyna aǵash kóshetteri egildi. Onyń ishinde alma aǵashtary jáne 50 shyrsha kósheti bar.
«Semeı kezinde elimizdiń eń jasyl qalalarynyń biri bolǵan. Endi oblys ortalyǵy mártebesin alǵan soń shahardy burynǵydaı jasyl jelegi mol aımaq retinde damytýǵa kúsh salynady. Aldaǵy jyldary budan da kóp aǵash otyrǵyzylady», dedi Abaı oblysynyń ákimi Nurlan Uranhaev.
Bul oraıda atalǵan kópir mańynan 1 aı buryn ǵana zamanaýı sporttyq ınfraqurylymmen jaraqtalǵan qoǵamdyq keńistik ashylǵan edi. Munda ýorkaýt-alańqaılary, skeıt-park, parkýr alańdary qarastyrylǵan. Bul aýmaq birneshe bólikke bólingen. Strıtbolǵa arnalǵan sporttyq aımaq, fıtnes aımaq jáne balalar oıyn alańy bar. Endi atalǵan keńistik aýmaǵy aǵashtarmen tolyǵyp otyr. Tutastaı alǵanda, oblys ortalyǵynda 478 aǵash, 100 buta egildi.
Sondaı-aq mereke qarsańynda óńir halqy baspanaly boldy. Máselen, qaladaǵy Qaraǵaıly shaǵyn aýdanynda 64 otbasyǵa kóp qabatty turǵyn úıdiń kilti tabystaldy. Oblys ákimi jańa páter ıelerin qonys toılarymen quttyqtap, bul baǵytta qurylys qarqyny eselenetinin aıtty.
«Memleket basshysynyń qoldaýymen óńirimiz óziniń damý jolyna túsip keledi. Keshendi jospar qabyldanyp, tyń jobalar iske asyrylady. Turǵyn úı qurylysynyń qarqynyn ulǵaıtý josparlanyp otyr. Bıyl qalada qarjylandyrýdyń barlyq kózi esebinen 5 166 páterge arnalǵan 496 415 myń sharshy metr baspana salý kózdelýde. Osylaısha, kezeń-kezeńimen baspana sany ulǵaıtylady», dedi N.Uranhaev.
Semeıdiń oń jaǵalaýynda bekitilgen bas josparǵa sáıkes «Qaraǵaıly» turǵyn alabynyń jobasy ázirlendi. Soǵan sáıkes aldaǵy ýaqytta 35 myńnan asa adamǵa 227 turǵyn úı salý mejelenip otyr.
Qazir bul aýdan sý qubyry, káriz-tazartý júıeleri, telekommýnıkasııa, jylý jáne elektr energııasynyń magıstraldyq jelilerimen qamtamasyz etilgen. Munda Nazarbaev zııatkerlik mektebi, 320 oryndyq balabaqsha, 5 600 kórermendik orny bar «Arena» mádenı-sporttyq kesheni ornalasqan. Qazir osy jerde jalpy aýdany 253,4 myń sharshy metrdi quraıtyn 41 úı paıdalanýǵa berilgen.
Ulttyq merekege baılanysty Úrjar aýdanynyń Taskesken aýylynda 12 páterli 6 úı paıdalanýǵa berildi. Jańa baspanaǵa turǵyn úı kezeginde turǵan ártúrli áleýmettik toptyń sanatyna kiretin jergilikti azamattar ıe boldy.
Sol sekildi Aqsýatta aýyl arasyn jalǵaıtyn joldardyń biri jóndeýden ótkizildi. Atap aıtqanda, Aqsýat pen Eski Ýchılıshe eldi mekeniniń arasyn jalǵaıtyn joldyń ortasha jóndeý jumystary tolyǵymen aıaqtaldy. Jóndeý jumystaryna qarajat «Aýyl-el besigi» baǵdarlamasy boıynsha respýblıkalyq bıýdjetten bólinipti. Osylaısha, aýdan halqynyń ótinishi qanaǵattandyryldy deıdi jergilikti atqarýshy organnyń ókilderi. Buǵan qosa atalǵan aýdanda memlekettik qoldaýdyń aıasynda 26 páterli 13 baspananyń irgetasy qalanyp, qurylysy bastaldy.
«Aqsýat aýylyndaǵy áleýmettik turǵydan az qamtylǵan otbasylarǵa arnalǵan turǵyn úı zaman talabyna saı salynady. Ár páterdiń jalpy aýmaǵy 85 sharshy metrdi quraıdy. Bul arqyly baspanaǵa muqtaj aýyl turǵyndarynyń áleýmettik máselesi birtindep sheshiledi», dedi ákimdik ókilderi.
Budan basqa Úrjar aýdanynyń Qabanbaı aýylynda jańa sport modýli paıdalanýǵa berildi. Atalǵan keshenge bıyl 330 jyldyq mereıtoıy ótip jatqan dańqty qolbasshy Qarakereı Qabanbaıdyń qurmetine arnap, «Daraboz» degen ataý berildi.
Mereke kúni jańa sport kesheninde qazaq kúresinen aýdandyq saıys uıymdastyryldy. Jeńimpazdar men júldegerler aýdandyq ákimdiktiń arnaıy dıplomy jáne qarjylaı sertıfıkatymen marapattaldy. Jarysqa osy óńirden shyqqan tanymal sportshylar qatysyp, jas balýandarǵa sáttilik tiledi. «Daraboz» sport kesheni aýyl jastarynyń buqaralyq sportpen aınalysyp, bolashaq chempıondardy daıyndaýǵa septigin tıgizetinin aıtty óńirdiń isker azamattary.
Abaı oblysy