D. Serikbaev atyndaǵy Shyǵys Qazaqstan tehnıkalyq ýnıversıtetiniń bazasynda Berlın tehnıkalyq ýnıversıtetiniń fılıaly ashylady. Prezıdent Qasym-Jomart Toqaevtyń Joldaýyn iske asyrý maqsatyndaǵy mınıstrliktiń bul bastamasyn búginde ShQTÝ-dyń professor-oqytýshylar quramy qoldap otyr.
Aıtýly kúni Shyǵys Qazaqstanǵa issaparmen kelgen Ǵylym jáne joǵary bilim mınıstri Saıasat Nurbek joǵary oqý ornynyń tehnıkalyq materıaldyq bazasymen, ǵylymı jetistikterimen, tyń jobalarymen tanysty. Sonymen qatar ýnıversıtettiń ǵylymı ortalyqtaryn aralap, «Prototıpteý jáne materıaldardy óńdeý» ǵylymı óndiristik kesheninde, qurylys jáne qurylys materıaldary salasyndaǵy Quzyrettilik jáne transfer ortalyǵynda boldy. Ǵylymı ortalyq qyzmetkerleri vedomstvo basshysyna medısınada qoldanylatyn tıtan ónimderin, gaz-munaı salasyna arnalǵan tıtan ónimderin, tantal men nıobııden daıyndalǵan medısınalyq buıymdardy, dıqan planshetin, 3D-prınterlerdi tanystyrdy. Búgingi tańda kez kelgen nysannyń 3D qujattamasyn jasaý jáne ólsheý nátıjelerin óńdeý úshin apparattyq jáne baǵdarlamalyq jobalar qajet. Sondaı-aq tehnıkalyq, tabıǵı jáne murajaı obektileriniń 3D qujattamasyn jasaý da suranysqa ıe. Odan bólek 3D qurylys prınterimen ártúrli kúrdeli formadaǵy ónimderdi az ýaqyt ishinde jobalap alýyńyzǵa bolady. Al mundaı zamanaýı múmkindik atalǵan joǵary oqý ornynyń bazasynda bar.
Osy oraıda ýnıversıtettiń ózge de jumystaryna toqtalyp óteıik. 2020 jyly oblystyq muraǵat, oblystyq kitaphana jáne oblystyq mýzeı materıaldaryn sıfrlandyrý boıynsha úlken joba iske asyryldy. Atap aıtsaq, «О́skemen tıtan-magnıı kombınaty» AQ úshin kitap qorynyń 3myńnan asa danasy sıfrlandyryldy. Jalpy, Shyǵys Qazaqstan tehnıkalyq ýnıversıtetiniń Ǵylymı kitaphanasy – Qazaqstan aýmaǵyndaǵy 1 mln danadan asa qory bar tehnıkalyq beıindegi eń iri joǵary oqý orny. Onyń ústine jyl saıyn kitaphana qory 10-15 myń dana kitapqa tolyǵyp otyrady. Kitaphana quramyna 5 oqý zaly, abonement bólimi jáne 7 mamandandyrylǵan bólim kiredi. Stýdentter, oqytýshylar men ǵylymı qyzmetkerler qajetti oqý, ǵylymı, kórkem jáne anyqtamalyq ádebıetterdi keńinen qoldanýǵa, referattar, kýrstyq, dıplomdyq jumystar jazý kezinde bilikti keńester alýǵa múmkindik mol. Kitaphananada ınternet jelisine qosylǵan 56 kompıýter, mýltımedııalyq qor, planetarlyq skanerler, prınterler, kóshirgishter kiredi.
Aıtqandaı, ǵylym salasy da kósh ilgeri. Aldyńǵy jyldary ÚMZ AQ-men birlesip, ýnıversıtet qabyrǵasynda ımplanttardyń 20-dan asa túrin daıyndaý tehnologııasy ázirlendi. Búginde olardy medısınalyq maqsatta paıdalanyp ta úlgerdi. О́nimniń 3 tabaqshasy pasıentterge ornatylǵan. Qazir klınıkalyq synaq kezeńi júrip jatyr. Sondaı-aq ımplanttardyń jańa túrlerin jasaý tehnologııalary ázirlenýde. Atap aıtsaq, ýkraınalyq jaq-bet hırýrgııasy qaýymdastyǵynyń seriktesterimen birge moıyn aqaýlary bar naýqastardy ońaltý úshin kompıýterlik tomografııa derekteri boıynsha 3D-basyp shyǵarý ádisimen medısınalyq ımplanttardy modeldeý jáne daıyndaý jumystary júrgizilip jatyr.
Ýnıversıtettiń ǵylym salasynda ashyp jatqan jańalyqtary kóp. Sebebi bilikti mamandardyń kóbi osy oqý orny qabyrǵasynda qyzmet etedi. Sonyń ishinde jyljymaly jol zerthanasynyń rólin aıta ketken abzal. Bul zerthana avtomobıl joldarynyń jaǵdaıyn dıagnostıkalaýǵa, pasporttaýǵa, baqylaýǵa arnalǵan. Joldardyń negizgi geometrııalyq parametrlerin, jol tósemderiniń beriktigin, jabynnyń tegistigin, qozǵalys qarqyndylyǵy men quramyn, joldyń qurylymdyq elementteriniń bolýy men jaı-kúıin anyqtaýdy qamtamasyz etedi.
Jalpy, Shyǵys Qazaqstan oblysynda ınjenerlik-tehnıkalyq beıindegi joǵary bilikti kadrlardyń suranysyn eskere otyryp, bedeldi eýropalyq ýnıversıtet fılıalynyń ashylýy óńirdegi joǵary bilimniń damýyna eleýli serpin beredi. Sonymen qatar aldaǵy ýaqytta nemis tehnologııalaryn oblystyń óndiristik kásiporyndarynda paıdalanyp, jumys barysyn jeńildetip, sapasyn arttyrýy ábden múmkin.
Berlın tehnıkalyq ýnıversıteti fılıalynyń ashylýyna baılanysty Qazaqstannan ǵana emes, TMD men Azııa elderinen de talapkerlerdiń aıtarlyqtaı kóbeıýi kútilýde. Ilkimdi isterdiń nátıjesinde D. Serikbaev atyndaǵy Shyǵys Qazaqstan tehnıkalyq ýnıversıtetiniń ǵalymdary birlesken ǵylymı-zertteýlerdi júrgizý jáne olardy odan ári kommersııalandyrý bóliginde eýropalyq áriptestermen neǵurlym tıimdi yntymaqtastyq qura alady.
Kezdesý sońynda Saıasat Nurbek D.Serikbaev atyndaǵy ShQTÝ stýdentteri men qyzmetkerleriniń óńir men el damýyna qosyp jatqan ǵylymı jetistikterin joǵary baǵalady. Kezdesý sońynda D. Serikbaev atyndaǵy ShQTÝ basqarma tóraǵasy-rektor Sáýle Rahmetýllına alǵysyn bildirdi.
Shyǵys Qazaqstan oblysy