Jáńgir han atyndaǵy Batys Qazaqstan agrarlyq-tehnıkalyq ýnıversıtetinde Ýfa memlekettik munaı tehnıkalyq ýnıversıtetiniń ókildigi ashyldy. Bul elimizdegi «Úıden – sheteldik bilim» qaǵıdasyn júzege asyrý maqsatynda ashylǵan joba.
Osy is-sharaǵa Batys Qazaqstan oblysynyń ákimi Ǵalı Esqalıev, Qazaqstan Respýblıkasy Ǵylym jáne joǵary bilim vıse-mınıstri Qýanysh Erǵalıev, Ýfa ýnıversıtetiniń rektory Oleg Baýlın men prorektory Naıl Chanyshev, Jáńgir han ýnıversıtetiniń basqarma tóraǵasy-rektor Asqar Námetov jáne seriktes kompanııalardyń basshylary qatysty.
Ýnıversıtet ókildiginiń tusaýkeser sharasyna Bashqurtstan Respýblıkasy basshysynyń ákimshilik jetekshisi Maksım Zabelın, Ǵylym,bilim jáne mádenıet boıyna federasııa keńesi komıtetiniń tóraıymy Lılııa Gýmerova, Bilim jáne ǵylym mınıstriniń birinshi orynbasary Ildar Mavletberdın onlaın jalǵanyp, qos ýnıversıtettiń arasyndaǵy áriptestik baılanystyń keńeıýimen quttyqtady.
– Memleket basshysy Qasym-Jomart Toqaev 2025 jylǵa deıin Qazaqstanda sheteldik jetekshi joǵary oqý oryndarynyń fılıaldaryn ashý jóninde tapsyrma bergen bolatyn. Búgingi shara – osy baǵytta jasalǵan alǵashqy qadam. Bul eki bilim ordasynyń ǵana emes, baýyrlas elderdiń ǵylym, joǵary bilim salasyndaǵy áriptestiginiń nyǵaıǵanyn kórsetedi, - dedi óz sózinde qazaqstandyq vıse-mınıstr Qýanysh Asylhanuly.
- Biz bir jyl buryn ǵana Bashqurtstan elinde bolyp, birneshe baǵyt boıynsha ortaq kelisimge kelgen edik. Sonyń biri – joǵary bilim berý salasyndaǵy áriptestik bolatyn. Mine, bir jyl ishinde osyndaı nátıjege qol jetkizip otyrǵanymyz qýantady. Sheteldik bilimdi «úıde» otyryp alý – óte tıimdi sheshim. Sonyń ishinde munaı-gaz sektory – mańyzdy sala. Bul bastama keıinnen quzyrly mınıstrliktiń qoldaýymen fılıal ashýǵa ulasyp jatsa, nur ústine nur bolar edi, – dedi Batys Qazaqstan oblysynyń ákimi Ǵalı Esqalıev.
Osy jıynda Jáńgir han ýnıversıteti men Ýfa ýnıversıtetiniń rektorlary ókildiktiń ashylýy jónindegi kelisimge qol qoıdy. Budan keıin qonaqtar ǵalymdardyń óndiriske engizýge daıyn ǵylymı jumystary qoıylǵan «Ǵylym – aımaqtyń ekonomıkasy úshin» atty kórmemen jáne Erasmus+ jobasy boıynsha «Qazaqstandaǵy ındýstrıaldy avtomatıka jáne robototehnıka boıynsha qosarly bilim berý (DIARKAZ)» jobasy aıasynda ashylǵan robototehnıka zerthanasynyń jumysymen tanysty.
Batys Qazaqstan oblysy