Memlekettik keńesshi Erlan Qarın Prezıdent janyndaǵy Qazaqstan strategııalyq zertteýler ınstıtýtynyń uıytqy bolýymen ótken «Qazaqstannyń saıası transformasııasy: búgini men bolashaǵy» taqyrybyndaǵy sarapshylar basqosýyna qatysty.
Sarapshylar forýmynyń jumysyna Qazaqstan strategııalyq zertteýler ınstıtýtynyń ekspertterinen bólek, belgili saıasattanýshylar men áleýmettik ǵylym baǵytyndaǵy sarapshylar, akademııalyq qoǵamdastyq ókilderi, ýnıversıtet oqytýshylary, zańgerler de atsalysty.
Talqylaý kezinde elimizdegi saıası ózgerister, júrgizilip jatqan reformalardyń baǵyt-baǵdary men alǵashqy nátıjeleri, bıyl 20 qarashaǵa belgilengen kezekten tys prezıdent saılaýynyń erekshelikteri jóninde sóz qozǵaldy. Sondaı-aq, forýmǵa qatysýshylar «Júıeni ózgertemiz be, álde qoǵamdy ózgertemiz be?», «Qoǵamnyń qozǵaýshy kúshi kimder?», «Jastardyń boıyna qandaı jańa qundylyqtardy sińiremiz?» degen suraqtar tóńireginde pikir talasyp, tujyrymdy baıandama jasady.
Basqosýda sarapshylar toby elimizde júrip jatqan saıası reformalarǵa keńinen toqtalyp, Parlamentte qabyldanǵaly jatqan zańdar, qoǵamdyq sananyń transformasııasy, jańa zamanýı kózqarastar men trendter barysyn qyzý talqylady. Dıskýssııa formatynda ótken is-sharada tyń oılar aıtylyp, naqty usynystar da ortaǵa tastaldy. Jıyn sońynda qatysýshylar «mundaı eksperttik talqylaýlardyń elimizde kóp bolǵany qajet» degen oılaryn ashyq bildirdi. «О́ıtkeni osyndaı saıası talqylaýlar memleketimizde óziniń zertteý salasy boıynsha mamandanǵan ekspertter qaýymynyń qalyptasýyna oń yqpal etedi», deıdi sarapshylar.