Saıasattaǵy áıelder áleýeti

«Tomiris» aqparattyq-bilim berý baǵdarlamasy aıasynda bastalǵan trenıng maqsaty – genderlik teńdik arqyly Qazaqstan ekonomıkasyn jaqsartý, sondaı-aq áıelder men qyzdardyń basqa­rýshylyq áleýeti men saıası mádenıetin damytý jáne áserin zertteý. Joba Aqparat jáne qoǵamdyq damý mınıstrligi, Prezıdent janyndaǵy Áıelder isteri jáne otbasylyq-demografııalyq saıa­sat jónindegi ulttyq komıssııa jáne Qazaq­standaǵy «BUU-áıelder» qurylymynyń qoldaýymen ótti.

Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraǵasynyń orynbasary, Parlament Májilisiniń depýtaty Lázzat Ramazanova ár óńirden bilim, jańa serpin izdep kelgen bolashaq jas saıasatkerlerge trenıngter keshendi túrde ótkizile bastaǵanyn aıtty.

«Biz saıasatqa kelgende mundaı dúnıe­ler joq edi. Árkim óz bilgenimen júrdi. Meniń oıymsha, bul shynymen de erekshe joba. Birinshiden, bul áreket zańnamalyq turǵyda negiz boldy. Memleket basshysy partııalardyń saılaý tiziminde áıelder men jastar úshin 30 paıyzdyq kvota qarastyrýdy usynǵany utymdy usynys, saıası erkindiktiń arqasynda áıelderge berilgen mol múmkindik dep bilemin. Eń tıimdi demokratııa eń jaqsy quraldardy qoldaný arqyly qurylady. Saıası damý týraly sóz bolǵanda, munda múlde basqa mehanızm engiziledi. Sizdiń kásibıligińiz árqashan sońǵy núkteni qoıa bermeıdi. Qazaqstannyń statıstıkasy áıelderdiń 52 paıyzyn quraıdy. Áıelderdiń mindeti ata-anaǵa qaraý, balany balabaqshaǵa aparý degen sııaqty syndy jıi estımin. Biraq oǵan qosymsha qarajat suramaımyz ǵoı. Bul máselede bizdiń kásibı qyzmetimiz bar. Eger siz bir maqsatqa jetýdi qalasańyz, onyń jolyn mindetti túrde tabasyz», degen ol trenıng qatysýshylaryna sáttilik tiledi.

Aqparat jáne qoǵamdyq damý mınıs­trligi Jastar jáne otbasy isteri komı­tetiniń tóraǵasy Qaırat Baı­mýldınov «Tomiris» aqparattyq-bilim berý baǵdarlamasynyń basty mindet­teriniń biri áıelder men qyzdardyń kósh­basshylyq jáne saıası belsendiligin arttyrý ekenin jetkizdi. «Bul trenıng arqyly áıelderdiń kóshbasshylyq qasıetterin joǵarylatyp, saıası naýqandarda belsendi bolýyna yqpal etemiz. Iаǵnı Qazaqstannyń saıası áleýetin arttyrýǵa yqpal jasaý», dedi ol.

Qazaqstan boıynsha 100-den astam qatysýshynyń barlyǵy óz óńirlerinde aýdıtorııasy aýqymdy jandar ekenin aıta ketelik. Máselen, astanalyq Áıel­der kúshteri alıansy tóraǵasynyń oryn­basary Baıan Toıkebaevanyń aıtýynsha, áıelderdiń qoǵamdaǵy rólin arttyrýǵa, áıelderdiń áleýmettik jaǵ­daıyn jaqsartýǵa, ekonomıkalyq múm­kin­dikterin keńeıtýge bul trenıngtiń bereri mol. «Áıelderdiń saıası kóshbasshylyq mektebin respýblıkanyń 16 óńirinde bas­tap jatyrmyz. Bul joba aıasynda mektep, kolledj, joǵarǵy oqý oryndary qyzdaryn da kóshbasshylyqqa  daıyndaý mektebiniń jospary qurylady», deıdi ol.

Al KASIP konsaltıng ortalyǵynyń basshysy, Áıelder kásipkerligin damytý ortalyǵynyń mentory, oraldyq trener, zańger Zýlfııa Tynymgereıqyzy kóp jyldan beri isker áıelder keńesimen jumys isteýiniń nátıjesinde konkýrs­tan ótip jobaǵa kelgen. Ol áıelderdi saıasatqa qalaı daıarlaý kerek, qandaı quraldar bar, alǵa kandaı maqsat qoıý kerek, eli­mizge kandaı lıderler kerek, saıasatta áıelderdiń róli qandaı ekenin túsinýge trenıngtiń septigi tıetinin jáne ony óz óńirindegi áıelderge jetkizetinin aıtady.

Trenıng búginde Qazaqstannyń barlyq óńirinen 25 trenerdi oqytý arqyly pýlyn qalyptastyrady. Sondaı-aq joba óńirlerdegi saıası belsendi áıel­derdi aldaǵy ýaqytta oqytý jáne olardy súıemeldeý múmkindigin arttyrady.

– Batys óńirinde ótinim berýshiler kóp boldy. Biraq trenıngke qabyldanǵandar sany – 25. Irikteýdi Aqparat mınıstrligi ótkizip, BUU usynylǵan kandıdattardy iriktep, bekitti. Basty talap kandıdattyń trenerlik tájirıbesiniń  jáne saılaý naýqanyna qatysý tájirıbesiniń bar bolýy boldy. Men – trenermin. Iаǵnı meniń qyzmetim bilim berý, daǵdy qalyptastyrý, keńes berý jáne súıemeldeýden turady. Al qalǵany ýaqyt enshisinde, – deıdi batysqazaqstandyq bıznes-trener Ásemgúl Qadyrhanova.

Atalǵan trenıng 1 qarashada bastalyp, 5 qarashaǵa deıin ótkiziledi.