Parlament Senatynyń depýtattary «Qazaqstan Respýblıkasyndaǵy Adam quqyqtary jónindegi ýákil týraly» zańdy qabyldady, dep habarlaıdy Egemen.kz.
Qazaqstan Respýblıkasynyń Ádilet mınıstri Qanat Mýsın atap ótkendeı, zań jobasynyń maqsaty adam jáne azamat quqyqtaryn júzege asyrýdyń kepili retinde Adam quqyqtary jónindegi ýákildiń konstıtýsııalyq mártebesin qamtamasyz etý bóliginde Qazaqstan Respýblıkasynyń Konstıtýsııasyna engizilgen ózgeristerdi iske asyrý bolyp tabylady.
«Konstıtýsııanyń jańa 83-1-babynyń normalarymen Ýákildiń qyzmetiniń mindetteri, táýelsizdigi men ókilettikterin júzege asyrý kezinde qandaı da bir ózge memlekettik organdar men laýazymdy adamdardyń aldynda esep bermeýiniń kepildikteri bekitildi. Budan bylaı Adam quqyqtary jónindegi ýákildiń quqyqtyq jaǵdaıy men onyń qyzmetin uıymdastyrý konstıtýsııalyq zańmen aıqyndalady», dedi Qanat Mýsın.
Zań jobasy Ýákil qyzmetiniń maqsattary men mindetterin, onyń quqyqtyq mártebesi men quzyretin ashady. Ýákildiń, onyń óńirlerdegi ókilderiniń jáne Adam quqyqtary jónindegi ulttyq ortalyqtyń qyzmetin uıymdastyrýǵa qatysty erejeler bar.
«Qoldanystaǵy zańda qarastyrylmaǵan negizgi erejeler bar. Birinshisi – Ýákildiń quzyretin kúsheıtý. Zań jobasynda Konstıtýsııa normalaryn iske asyrý maqsatynda ýákiletti tulǵanyń adam men azamattyń bekitilgen quqyqtary men bostandyqtaryn qozǵaıtyn normatıvtik quqyqtyq aktilerdiń Konstıtýsııaǵa sáıkestigi týraly másele boıynsha Konstıtýsııalyq Sotqa júginý quqyǵy kózdelgen. Sondaı-aq olardyń shaqyrýy boıynsha basqa memleketterde adam quqyqtary men bostandyqtarynyń saqtalýyna baqylaýshy retinde qatysý quqyǵyn berý usynyldy», dep túsindirdi Q.Mýsın.
Ýákildiń quzyretin kúsheıtý maqsatynda onyń arnaýly áleýmettik qyzmetter kórsetetin uıymdarǵa, sondaı-aq qylmystyq-atqarý júıesi mekemelerine kedergisiz barý quqyǵy bekitilgen.
Ekinshiden, ýákiletti tulǵanyń qyzmetin uıymdastyrý tıimdiligin arttyrý bóliginde zań jobasynda Adam quqyqtary jónindegi ulttyq ortalyq basshysynyń orynbasary laýazymyn, sondaı-aq Ulttyq ortalyqtyń qosymsha fýnksııalaryn engizý usynylady.