Memleket basshysy Qasym-Jomart Toqaev sheteldik dıplomattardy 70 mlrd dollar aktıvteri bar álemdegi eń iri 30 táýelsiz qordyń qataryna kiretin «Samuryq-Qazyna» Qorymen belsendi ózara is-qımyl jasaýǵa shaqyrdy, dep habarlaıdy Egemen.kz Aqordanyń baspasóz qyzmetine silteme jasap.
«Qazirgi ýaqytta Qor ashyqtyq pen tıimdilikti arttyrýǵa baǵyttalǵan keshendi transformasııadan ótip jatyr. Osy turǵyda basty baǵyttardyń biri - «Samuryq-Qazyna» qorynyń portfeldik aktıvterin jekeshelendirý. Ulttyq munaı kompanııasy, áýe tasymaldaýshysy jáne temirjol kompanııasy sııaqty Qordyń eń iri aktıvteri jaqyn arada jarııa bolady. QazMunaıGaz - bizdiń ulttyq munaı chempıonymyz osy kúzde Qazaqstanda IPO ótkizedi», dedi Prezıdent.
Aıta ketsek, búgin QR Prezıdenti Qasym-Jomart Toqaev sheteldik dıplomatııalyq mıssııalardyń basshylarymen kezdesý ótkizdi. Kezdesýde Memleket basshysy dıplomatııalyq korpýspen kezdesýlerdi ekijaqty jáne kópjaqty yntymaqtastyqty nyǵaıtýǵa baǵyttalǵan jaqsy dástúr dep atady.