Memleket basshysy Qasym-Jomart Toqaev Mańǵystaý oblysynyń jurtshylyǵymen kezdesý barysynda oblystaǵy halyq sany 2,5 esege óskenin aıtty, dep habarlaıdy Egemen.kz.
«Táýelsizdik jyldarynda oblystaǵy halyq sany 2,5 esege ósti. О́ńirde halyq sanynyń kúrt kóbeıýine baılanysty birqatar máseleler bar. Ony biz jaqsy bilemiz. Múmkindikke qaraı bárin birtindep sheship jatyrmyz. Jalpy, Mańǵystaý oblysy árdaıym meniń erekshe nazarymda. Memleket basshysy qyzmetine kirisken kezde eń aldymen kıeli Túrkistan men Mańǵystaýǵa barǵanymdy bilesizder», dedi Prezıdent.
Memleket basshysy byltyr Úkimet pen ákimdikke Mańǵystaý oblysyn damytýdyń keshendi josparyn bekitýdi tapsyrǵanyn eske saldy.
«Byltyr osynda arnaıy kelip, oblysty damytý týraly aýqymdy jıyn ótkizdim. Úkimet pen ákimdikke Mańǵystaý oblysyn damytýdyń keshendi josparyn bekitýdi tapsyrdym. Qujat qabyldanyp, ony júzege asyrýǵa tıisti qarajat bólindi. О́ńirdiń bárine birdeı arnaıy jospar qabyldanyp jatqan joq. Osynyń ózi Mańǵystaý jurtynyń tynys-tirshiligin jaqsartýǵa aıryqsha mán beretinimizdi kórsetedi. Endigi mindet – bul jospardy múltiksiz oryndap, óńirdi kórkeıtý. Toǵyz joldyń torabynda turǵan qazynaly ólkeni jan-jaqty órkendetýge tolyq múmkindik bar. Mańǵystaý oblysy qaı turǵydan alyp qarasaq ta, erekshe aımaq», dep atap ótti Qasym-Jomart Toqaev.