Memleket basshysy Mańǵystaýǵa saparynda oblystyń ınvestısııalyq áleýetin arttyrýdy nazarǵa alýdy usyndy, dep habarlaıdy Egemen.kz Aqordanyń resmı paraqshasyna silteme jasap.
«Avtomobıl joldarynyń sapasyn jaqsartýǵa erekshe mán beremiz. Men buǵan deıin «Beıneý-Shalqar» tas joly qurylysynyń mańyzdylyǵy jóninde aıttym. Jumys óte baıaý júrip jatyr. Úkimetke qurylysty bastaý úshin qajetti qujattardy jedel daıyndaýdy tapsyramyn.
О́ńir turǵyndary oblystyq deńgeıdegi joldyń sapasy jóninde jıi shaǵym aıtady. Úkimet ákimdikpen birlesip, «Aqtaý – Fort-Shevchenko», «Taýshyq-Shetpe» joldaryn jóndeýge kelesi jyldan bastap kirisýi kerek. Jol sapasy – ár aımaqtyń damý deńgeıin aıqyndaıtyn basty kórsetkishtiń biri», dep atap ótti Prezıdent.
Sondaı-aq ol azamattar damýdyń nátıjesin jınalystarda emes, kúndelikti ómirde kórip, sezinýi kerektigin aıtty.
«Ekonomıkanyń turaqty damýyna tyń serpin berý úshin oblystyń ınvestısııalyq áleýetin arttyrǵan jón. «Aqtaý teńiz porty» arnaıy ekonomıkalyq aımaǵynyń qyzmeti buǵan mol múmkindik týǵyzyp otyr. Bul aımaq – ınvestısııa tartý, ónim óndirý, salyq tóleý kórsetkishteri boıynsha respýblıkada eń úzdik úsh aımaqtyń biri. Buǵan deıin men arnaıy ekonomıkalyq aımaqtarda bos jatqan jer telimderin ınfraqurylymmen qamtamasyz etýdi tapsyrdym. Osy jumysty jandandyramyz», dedi Memleket basshysy óz sózinde.
Sondaı-aq ol elimizdiń sheteldik áriptestermen ınvestısııalyq yntymaqtastyqty damytyp kele jatqanyn alǵa tartty. Sonyń biri – «Jasyl» sýtegin óndirý jáne taratý ortalyǵyn» salý jobasy» ekenin aıtyp, Úkimet arnaıy ekonomıkalyq aımaqtardyń jumys isteý merzimin uzartýy kerek dep túıindedi.