Búgin Senat Spıkeri Máýlen Áshimbaevtyń tóraǵalyǵymen Palata otyrysy ótti. Onda depýtattar 2023-2025 jyldarǵa arnalǵan jalpy sıpattaǵy transfertterdiń kólemi týraly, Ulttyq qordan kepildendirilgen transfert týraly jáne aldaǵy úsh jylǵa arnalǵan respýblıkalyq bıýdjet týraly zań jobalaryn qarady, dep habarlaıdy Egemen.kz Parlament Senatynyń baspasóz qyzmetine silteme jasap.
Senat Tóraǵasy aldaǵy úsh jyldyq bıýdjetti qalyptastyrýda Memleket basshysynyń qazaqstandyqtardyń suranystary men talaptaryna negizdelgen tapsyrmalaryn oryndaýǵa basymdyq berilgenin atap ótti.
«Senatta bıýdjet jan-jaqty taldanyp, pysyqtaldy. Búgin qaralǵan respýblıkalyq bıýdjettiń jobasynda qoǵamdy alańdatqan mańyzdy áleýmettik máselelerdi sheshýge jetkilikti qarajat qarastyrylǵan», dedi Máýlen Áshimbaev.
Palata Spıkeri el Prezıdenti áleýmettik salaǵa basa mán berip otyrǵanyn aıtty.
«Memleket basshysy áleýmettik salaǵa qatysty naqty tapsyrmalar berdi. Ásirese, aýyldyq jerlerde ómir súrý sapasyn arttyrýǵa aıryqsha kóńil bólinýde. Prezıdentimizdiń tapsyrmalaryn sapaly iske asyrý – strategııalyq mindet», dedi Senat Tóraǵasy.
Máýlen Áshimbaevtyń aıtýynsha, tek «Jaıly mektep» ulttyq jobasyn iske asyrý úshin aldaǵy úsh jylda shamamen 2,6 trln teńge bólinedi.
«Sonyń nátıjesinde jańa oqýshy oryndarynyń sany 820 myńnan asýǵa tıis. Sol arqyly elimizdegi úsh aýysymdy mektep problemasy jáne bir synyptaǵy balalar sanynyń shamadan tys kóp bolýy negizinen sheshiledi dep senemiz. Sondaı-aq áleýmettik tólemderdi ındeksteýge, pedagogter men dárigerlerdiń jáne azamattyq qyzmetkerlerdiń jalaqysyn 25 paıyzǵa arttyrýǵa tıisti qarajat qarastyryldy. Jergilikti bıýdjetterge jalpy transfertterdi eskersek, kelesi jyly áleýmettik shyǵystar 2 trln teńgege, ıaǵnı shamamen 20 paıyzǵa ósedi. Ulttyq qordan transfertter kólemin kezeń-kezeńimen qysqartý da josparlanyp otyr», dedi Máýlen Áshimbaev.
Memleket basshysynyń sheshimine sáıkes Ulttyq qordyń ınvestısııalyq tabysynyń jartysy balalardyń jınaqtaý shottaryna aýdarylatyny belgili. Atalǵan tólemder 2023 jyldyń qorytyndysy boıynsha júrgizile bastaıdy. Senat Tóraǵasy atap ótkendeı, bul Ulttyq qor bolashaq urpaqtyń qoryna aınalady degen sóz.
Senatta zań jobalaryn talqylaý kezinde Palata depýtattarynan 100-den astam usynys kelip tústi.
Máselen, senatorlardyń usynysy boıynsha eldi mekenderdiń kóshelerin, avtojoldar men kópirlerdi salýǵa jáne qaıta qalpyna keltirýge qosymsha 13,7 mlrd teńge bólý josparlanyp otyr. Tek kelesi jyldyń ózinde osy maqsatqa 7,8 mlrd teńge bólinbek. Halyqty taza aýyz sýmen qamtamasyz etý jaǵdaıyn jaqsartý úshin qosymsha 22,2 mlrd teńge qarastyrylyp otyr. Senatorlardyń bul usynysy turǵyndardyń sýmen qamtamasyz etý qyzmetterine qoljetimdiligin qalalyq jerlerde – 99 paıyzǵa, al aýyldarda 96,1 paıyzǵa arttyrýǵa yqpal etedi. Gazben jabdyqtaý jumystaryn odan ári jaqsartýǵa 14 mlrd teńge baǵyttalady. Bul gazdandyrý deńgeıin 61,6 paıyzǵa deıin jetkizýge múmkindik beredi.
Otyrys barysynda depýtattar óńirlerdi órkendetý saıasatyna, onyń ishinde salyq túsimderine, agrosektordy qoldaýǵa, shaǵyn jáne orta bıznesti damytýǵa jáne basqa da máselelerge qatysty túıtkilderdi kóterdi.