Astana tórinde ornalasqan Qazaqstan Respýblıkasy Qarýly Kúshteri Memlekettik Áskerı-tarıhı mýzeıinde qazirgi Túrkııa Respýblıkasynyń negizin qalaýshy Mustafa Kemal Atatúrikti eske alý maqsatynda elordadaǵy Iýnýs Emre túrik mádenıet ortalyǵynyń uıymdastyrýymen «Atatúrik jadymyzda» atty foto kórme ótti.
Atalǵan is-sharaǵa Túrkııanyń Qazaqstandaǵy tótenshe jáne ókiletti elshisi Ýfýk Ekıdjı, Iýnýs Emre ınstıtýty Baqylaý keńesiniń múshesi Álı О́zgúndúz jáne Qorǵanys mınıstrliginiń ókilderi qatysyp, kórme ekspozısııasyna uly qaıratkerdiń ómir-tarıhynan aqpar beretin 40-tan astam foto qoıyldy.
Mártebeli jıyndy ashyp sóz sóılegen elshi Ýfýk Ekıdjı myrza, búgingi is-sharanyń basty keıipkeri bolyp otyrǵan Mustafa Kemal Atatúrik osydan 84 jyl buryn dál búgingi 10 qarasha kúni saǵat taǵy 09:05-te ómirden ótken bolatyn. Bul sát túrkııalyqtar úshin Atatúrikti eske alý, ıaǵnı ulttyq aza tutý rásimi retinde belgili. Bul kúni el kóleminde 2 mınýttyq únsizdik jarııalanady. Odan keıin qaıratker júzege asyrǵan reformalar jaıly halyqqa túsindirilip, onyń sóılegen sózderi radıo, teledıdar arqyly óz daýsymen kópshilikke tyńdatylady, sonymen qatar tulǵa jaıly derekti fılmder kórsetiledi. Osy is búgingi tańda Qazaqstan elininiń astanasynda jalǵasyn taýyp otyrǵany qýantady, dedi.
Rasyn aıtsaq, qazirgi týysqan Túrik memleketi Atatúriktiń týyndysy. Ol kisi eń áýeli bilim berý jónindegi tyń reformany júzege asyrdy. Anadolynyń ártúrli qalalarynda kásiptik mektepter, tehnıkýmdar, muǵalimder daıarlaıtyn mektepter, orta mektepter men lıseıler ashty. Túrkııa latyn alfavıtin qabyldatty. Jańa alfavıt batys órkenıetimen úndesýge úlken úles qosty. Sondaı-aq til reformasyn júzege asyrdy. Qysqa merzimde túrik tilin ǵylym men bilim tiline aınaldyrdy... taǵysyn taǵylar.
Kelesi kezekte sóz alǵan Iýnýs Emre ınstıtýty Baqylaý keńesiniń múshesi Álı О́zgúndúz myrza, kórmeni uıymdastyrýshylarǵa rızashylyq bildire otyryp: «Zamanaýı Túrik Respýblıkasynyń negizin qalaýshy, azattyq maıdanynyń bas qolbasshysy, HH ǵasyrdyń kemeńger memleket qaıratkeri Kemal Atatúrik ataqty sheıh Qoja Ahmet Iаsaýıdiń jolyn tańdaǵan tulǵa. Sondaı-aq adamdy súıýdi dáripteıtin úlken ǵulama Iýnýs Emreniń gýmanıstik fılosofııasyn ustanǵan adam. Sondyqtan da bul kisiniń saıası joly men dinı ilimi qazirgi qazaq baýyrlarymyzǵa da jat emes, biz osy qaıratker tulǵalardyń isin ónege etýimiz kerek», dedi.
Jıyn barysynda Qazaqstan Respýblıkasy Qarýly Kúshteri Ulttyq áskerı-patrıottyq ortalyǵynyń áskerı orkestri qaıratkerdiń qurmetine áskerı marsh ánderin kópshilikke usynsa, Túrkııadan kelgen ánshi Atatúrik súıip tyńdaǵan shyǵarmalardy oryndady. Al qazaqstandyq jas sýretshi Albına Ábenova ózi salǵan Atatúriktiń qos portretin sharanyń qurmetti qonaqtaryna tartý etti.