Teńiz jaıaý áskerleri brıgadasynda alǵashqy áskerı daıyndyq kýrsynan ótken elimizdiń toǵyz oblysynan áskerge shaqyrylǵan tórt júzden astam sarbaz Otan aldynda adal bolýǵa ant berdi, dep habarlaıdy Egemen.kz.
Saltanatty sharaǵa Qorǵanys mınıstriniń orynbasary general-leıtenant Sultan Kamaletdınov, Mańǵystaý oblysy ákiminiń birinshi orynbasary Bekbol Orynbasarov, áskerı qyzmetshiler, qoǵam ókilderi, Qarýly kúshterdiń ardagerleri, aýǵan jaýyngerleri, jas sarbazdardyń týystary men jaqyndary qatysty.
Saptyq alańda shymyr da myǵym jaýyngerler sap túzedi.
– Búgin sender Otanǵa adal bolýǵa ant berip, elimizdiń qorǵaýshysy boldyńdar. Ásker – erlik mektebi. Qyzmet barysynda alǵan daǵdylar áskerden keıin de paıdaly bolatynyna kúmánim joq. Qıyndyqtardan moıymańdar, olar senderdi shyńdap, qataıtady. Tájirıbe jınańdar, ol bolashaqta ózderiń úshin jumys isteıdi, – dedi Qorǵanys mınıstriniń orynbasary general-leıtenant Sultan Kamaletdınov teńiz jaıaý áskerlerine.
Saltanatty rásimnen keıin jas jaýyngerlerdi osyndaı aıtýly oqıǵamen ata-analary quttyqtady.
– Uldarymyzdyń er-jetip qalǵanyn baıqadyq. Áskerdegi qyzmet balalarymyzdyń jeke tulǵa retinde qalyptasýyna yqpal etedi. Biraq, eń aldymen, bul elimizdiń qaýipsiz bolýy men shekaralarymyzdyń senimdi qorǵalýy úshin qajet, – dep atap ótti qatardaǵy jaýynger Baqdáýlet Bazarbekovtyń ákesi túrkistandyq Nurpeıis Jamalov.
Bir aı ishinde qarapaıym balalar áskerı ortaǵa boı úıretip, áskerı adam tárizdi shymyr da myǵym bolyp qalǵan.
– Men áskerge Túrkistan oblysynan shaqyryldym. Osy ýaqyt ishinde bul jerge beıimdelip, túrli aımaqtardan kelgen balalarmen dostasyp, kóp nárseni úırendim. Men úshin ant berý – úlken jaýapkershilikti júkteıdi. Maǵan senim artqan jaqyndarymnyń úmitin aqtap, áskerı boryshymdy abyroımen oryndaýǵa barymdy salamyn, – dedi qatardaǵy jaýynger Rahmatýlla Kamılbetov.