Mádenıet jáne sport mınıstrligi «Arman asýlary» atty áleýmettik pılottyq jobany qolǵa aldy, dep habarlady Egemen.kz vedomstvonyń baspasóz qyzmetine silteme jasap.
Onyń basty maqsaty - Qazaqstannyń barlyq óńirlerinen erekshe bilim berý qajettilikteri bar daryndy balalarǵa qoldaý kórsetý, shyǵarmashylyq baǵytta damytý. Joba balalar jyly aıasynda júzege asyrylyp otyr.
Gala-konsertke qatysqan balalardy Mádenıet jáne sport mınıstri Dáýren Abaev quttyqtap, ınklıýzıvti bilim berý men qoǵamdy damytýda mundaı jobanyń mańyzy zor ekenin atap ótti. Elimizdegi erekshe balalardyń ónerin ushtaýǵa baǵyttalǵan festıval respýblıkamyzdyń ár aımaǵyndaǵy daryndy jastardyń basyn qosady.
«О́ner – adamnyń janyn ǵana emdemeıdi, onyń tánine de tirek bolady. Balalardyń talantyn ashýda mundaı alańdar árkez qajet. Sondyqtan osy jobany júzege asyrýǵa atsalysqan azamattardyń barlyǵyna alǵys aıtamyn. Sizder balalardy baqytty, al qoǵamdy meıirimdi etýge úles qosyp otyrsyzdar», dedi Dáýren Abaev.
Gala-konsertte Roza Rymbaeva, Aıjan Nurmaǵambetova, Qurmash Mahan, Saltanat Meńdiǵalıeva, Álibek Álmadıev, Rýhııa Baıdýkenova, Dıdar Abdýhalyq, Gúldana Akımova (fleıta) syndy tanymal ónerpazdar, «Astana sazy» memlekettik folklorlyq ansambli, «Melomen» toby, Turan folklorlyq-etnografııalyq ansambli, Forte Trio jáne Saz&Soul shyǵarmashylyq ujymdary balalarmen birge óner kórsetti. Muny festıvaldiń erekshelikteriniń biri retinde atap ótsek bolady.
Pılottyq jobaǵa birneshe uıym seriktes boldy, olardyń qatarynda BI Juldyzaı korporatıvtik qory, BINOM SCHOOL jáne «Nurly júrek» áleýmettik qamsyzdandyrý ortalyǵy bar.