22-23 qarashada Astanada Sırııa boıynsha kelissózderdiń jańa kezeńi ótedi. Bul týraly QR SIM resmı ókili Aıbek Smadııarov málimdedi, dep habarlaıdy Egemen.kz.
Onyń aıtýynsha, kelissózderge Reseı, Túrkııa, Iran, Sırııa úkimeti men Sırııa oppozısııasynyń delegasııalary qatysady. Baqylaýshylar retinde BUU, Iordanııa, Lıvan jáne Irak ókilderi keledi dep kútilýde.
«2022 jylǵy 22-23 qarashada Astana qalasynda Sırııa boıynsha kezekti 19-shy Halyqaralyq kezdesý ótedi», dedi QR SIM resmı ókili.
Kún tártibine kelesi máseleler engiziledi:
Sırııadaǵy gýmanıtarlyq jáne áleýmettik-ekonomıkalyq jaǵdaı; Saıası prosesti keshendi ilgeriletý; Senim sharalary, sonyń ishinde kepilge alynǵandardy bosatý jáne habar-osharsyz ketkenderdi izdeý; Sırııany janjaldan keıin qalpyna keltirý jáne sırııalyq bosqyndardyń otanyna oralýyna jaǵdaı jasaý maqsatynda halyqaralyq qoǵamdastyqtyń kúsh-jigerin jumyldyrý.SIM resmı ókili atap ótkendeı, birinshi kúni kepilger elderdiń ekijaqty jáne úshjaqty konsýltasııalaryn ótkizý, sırııalyq taraptarmen kelissózder júrgizý, baıqaýshy taraptardyń delegasııalarymen baılanys ornatý kútilýde.
Ekinshi kúni konsýltasııalardy jalǵastyrý, plenarlyq otyrys jáne baspasóz konferensııasy josparlanýda.
Budan basqa, kelissózder sheńberinde BUU-nyń kepildik berýshi elderi men sarapshylarynyń, sondaı-aq Halyqaralyq Qyzyl Krest komıtetiniń qatysýymen kúshtep ustalatyn adamdar boıynsha jumys tobynyń otyrysyn ótkizý josparlanǵan.