Aqtóbe oblysynda aýyl mektepterindegi bilim sapasyn arttyrý maqsatynda «Bilim ALL» jobasy bastaý aldy. Jobaǵa materıaldyq-tehnıkalyq bazasy nashar, bilikti muǵalimderi az, oqýshylarynyń bilim kórsetkishi óte tómen 120 shaǵyn jınaqty mektep tańdap alyndy. Búginde mundaı mektepterde 10 575 oqýshy oqıdy.
«Bilim ALL» jobasyn talqylaýǵa arnalǵan jıynda óńir basshysy Eraly Toǵjanov: «Memleket basshysynyń qoldaýymen Qazaqstanda balalardyń jan-jaqty damýy men sapaly bilim alýyna barlyq jaǵdaı jasalǵan. Sonyń ishinde mektepterdiń materıaldyq-tehnıkalyq bazasyn jańartý, bilikti muǵalimdermen qamtamasyz etý, ınternet baılanysyn kúsheıtý boıynsha aýqymdy jumys iske asyrylýda. Aqtóbe oblysynda da 2025 jylǵa deıin 282 mektep jańartylady. Qazirgi kezde 114 mekteptiń pándik kabınetteri jańadan jasaqtalyp, mektep jıhazdary, kitaphanalary men ashanalaryn jańartý jumystary júrgizilip jatyr. Soǵan qaramastan qala men aýyl mektepteriniń arasyndaǵy bilim sapasynyń alshaqtyǵy ulǵaıyp barady. Oǵan áser etetin birneshe másele bar. Osy kemshilikterdi joıýǵa, aýyl balalarynyń bilim deńgeıin joǵarylatýǵa «Bilim ALL» jobasy oń áserin tıgizetinine senimdimin», dedi. Oblys ákimi bastamany qoldaǵan muǵalimderge alǵysyn bildirdi.
Aıta ketý kerek, qazirgi kezde óńirdegi 424 mekteptiń 281-i eldi mekenderde ornalassa, onyń 204-i – shaǵyn jınaqty mektep.
«Alǵa aýdanyndaǵy 29 bilim oshaǵynyń 13-i shaǵyn jınaqty mektep. Máselen, bizdiń mektepte 58 bala oqıdy. Bul joba aýyl muǵalimderine tájirıbe jınaqtaýǵa jáne biliktiligin arttyrýǵa tamasha múmkindik beredi degen senimdemin», deıdi Alǵa aýdanyndaǵy Qaraqobda aýylynyń mektep-balabaqsha dırektory Erkinbek Zııadınov.
Jobaǵa engen shaǵyn jınaqty mektepterdiń pán muǵalimderine matematıka, fızıka, hımııa, bıologııa, aǵylshyn tili pánderi boıynsha Aqtóbedegi 6 jetekshi mekteptiń úzdik 25 muǵalimi sabaq beredi. Aqtóbeniń úzdik muǵalimderi dáristerdi negizinen onlaın-sabaqtar túrinde ótkizedi. Olardyń qatarynda «Daryn» mektep-ınternaty, «Bilim-ınnovasııa» lıseı-ınternaty, mamandandyrylǵan fızıka-matematıka lıseı-ınternaty jáne taǵy da basqa úzdik mektepter bar.
«Qala men aýyldaǵy bilim deńgeıin teńestirý maqsatynda qolǵa alynyp jatqan jobanyń qatysýshysy bolý – biz úshin úlken mártebe. Kóp jaǵdaıda aýyldaǵy daryndy balalardy bilikti muǵalimderdiń joqtyǵynan der kezinde tanı almaı jatamyz», dedi M.Qusaıynov atyndaǵy daryndy balalarǵa arnalǵan mamandandyrylǵan lıseı-ınternatynyń matematıka pániniń muǵalimi, Aqtóbe oblysynyń úzdik pedagogi Nurbek Abdýllın.
Iriktelip alynǵan 120 shaǵyn jınaqty mekteptegi oqýshylardyń bilim deńgeıiniń joǵarylaýy nemese tómendeýi arnaıy qurylǵan komıssııa jumysynyń qorytyndysy negizinde jáne oqýshylarynyń test tapsyrmalaryn oryndaýy nátıjesinde baqylanady.
Aqtóbe oblysy