Premer-Mınıstr Álıhan Smaıylovtyń tóraǵalyǵymen ótken búgingi Úkimet otyrysynda Qazaqstannyń bıylǵy 10 aıdaǵy áleýmettik-ekonomıkalyq damý kórsetkishteri talqylandy, dep habarlaıdy Egemen.kz.
Otyrys barysynda Ulttyq ekonomıka mınıstri Álibek Qýantyrov baıandama jasap, atalǵan kezeńde respýblıkada JIО́ ósý qarqyny 2,5%-dy qurady. Atap aıtqanda, ekonomıkanyń naqty sektory 2,8%-ǵa, qyzmet kórsetý salasy 1,6%-ǵa ósti. Salalar arasynda aýyl sharýashylyǵy (8,2%), aqparat jáne baılanys (7,1%), qurylys (5%), óńdeý ónerkásibi (4,3%), saýda (4,1%), kólik jáne qoımalaý (3,9%) oń dınamıkany kórsetip otyr.
Mınıstr ataǵan derekterge qaraǵanda, 2022 jyldyń qańtar-qyrkúıek aılarynda Qazaqstannyń syrtqy saýda aınalymy 35%-ǵa ósip, $98,4 mlrd-ty qurady. Eksport boıynsha kórsetkish 47,5%-ǵa ($63,8 mlrd), óńdelgen taýarlar eksporty 37,5%-ǵa ($19,3 mlrd) ósti. Import $34,6 mlrd-ty qurady (16,5%-ǵa ósken). Jalpy Qazaqstannyń oń saýda teńgerimi $29,3 mlrd-qa jetti (2,2 ese ósken).
Premer-Mınıstrdiń orynbasary – Qarjy mınıstri Erulan Jamaýbaevtyń aıtýynsha, memlekettik bıýdjetke 12 trln 427 mlrd teńge kiris tústi (jospar 104%-ǵa oryndaldy). Atap aıtqanda, respýblıkalyq bıýdjet 8,4 trln teńgege (102%), jergilikti bıýdjetter 4 trln teńgege (108,5%) tolyqty. Memlekettik bıýdjet shyǵystary 96,7%-ǵa, onyń ishinde respýblıkalyq bıýdjet shyǵystary 98%-ǵa (14,5 trln teńge), jergilikti bıýdjetter shyǵystary 94%-ǵa (8,1 trln teńge) oryndaldy.
Jıynda Ulttyq bank tóraǵasynyń orynbasary Berik Sholpanqulov ta baıandama jasady.
Premer-Mınıstr Álıhan Smaıylov búgingi tańda el ekonomıkasy qalypty ósý qarqynyn saqtap otyrǵanyn, naqty sektor ekonomıkany turaqtandyrýdyń negizgi faktory retinde damýdyń oń úrdisin kórsetip otyrǵanyn atap ótti. Atap aıtqanda, óńdeý ónerkásibindegi óndiris kólemi 4,3%-ǵa, mashına jasaý salasyndaǵy óndiris kólemi 7,7%-ǵa, aýyl sharýashylyǵynda 8%-dan astamǵa ósti.
Álıhan Smaıylovtyń aıtýynsha, ishki jáne syrtqy ınvestısııalardy tartý – ekonomıkalyq ósýdiń mańyzdy faktory. Jalpy atalǵan kezeńde negizgi kapıtalǵa ınvestısııalardyń ósýi 6,7%-dy qurap otyr.
«Onyń ishinde ekonomıkanyń shıkizattyq emes salalaryna tartylǵan ınvestısııa kólemi ulǵaıyp keledi. Investısııanyń joǵary ósimi jyljymaıtyn múlikpen jasalatyn operasııalarda, sondaı-aq kólik jáne qoımalaý, aýyl sharýashylyǵy jáne ónerkásipte tirkeldi», dedi Premer-Mınıstr.
Úkimet basshysy barlyq negizgi makrokórsetkishter boıynsha Qostanaı, Aqmola, Jambyl, Shyǵys Qazaqstan, Qyzylorda oblystarynda, Almaty jáne Shymkent qalalarynda ósim bar ekenin qosa aıtty.
Álıhan Smaıylov turaqty damý qarqynyn ustap turý úshin ekonomıkany ári qaraı ártaraptandyrý, ınvestısııa tartý jáne turaqty jumys oryndaryn qurý boıynsha jumysty kúsheıtý qajettigin atap ótti.
«О́ńir ákimdikteri josparlanǵan kórsetkishterdi qamtamasyz etip, ınvestısııa tartý jumystaryn jandandyrýy qajet. Sondaı-aq ınvestısııalyq jobalardy iske asyrýǵa turaqty monıtorıng júrgizýi tıis», dedi ol.
Odan bólek, Premer-Mınıstr baǵanyń ósýin tejeý jumystaryn turaqty baqylaýda ustaý kerek ekenin aıtty. Sebebi azyq-túlik taýarlary baǵasynyń ósýi ınflıasııaǵa aıtarlyqtaı áser etip keledi.
«Bul, birinshi kezekte, ákimdikter tarapynan qabyldanyp jatqan sharalardyń jetkiliksiz ekenin kórsetedi», dedi Álıhan Smaıylov.
Sóz sońynda Úkimet basshysy óńirler osy jyldyń sońyna deıin áleýmettik-ekonomıkalyq damýdyń josparlanǵan kórsetkishterine qol jetkizip, Memleket basshysy qoıǵan mindetterdiń tıimdi iske asyrylýyn qamtamasyz etýi qajettigin atap ótti.