Qasym-Jomart Toqaevtyń tapsyrmasymen Máýlen Áshimbaev Irannyń Qazaqstandaǵy elshiligine baryp, qaıǵyly oqıǵalar saldarynan atalǵan eldiń rýhanı kóshbasshysynyń jáne beıbit turǵyndardyń qaıtys bolýyna baılanysty Iran halqyna kóńil aıtty, dep habarlaıdy Egemen.kz.
О́z sózinde ol qaıǵyly oqıǵany aýyr qabyldaǵanyn jetkizip, Qazaqstan Prezıdenti, halqy jáne Parlamenti atynan Iran halqyna jáne qaza tapqandardyń týǵan-týystaryna qaıǵyryp kóńil aıtty.
Sondaı-aq ol halyqaralyq qaqtyǵystar tek dıplomatııalyq jolmen, Birikken Ulttar Uıymy Jarǵysy men halyqaralyq quqyq normalary negizinde sheshilýi tıis ekenin atap ótti. Qarýly qaqtyǵystar kezinde beıbit turǵyndar men azamattyq nysandardy qorǵaý basty basymdyq bolýy kerektigine toqtaldy.
Iran prezıdenti kórshi elderge úndeý jasady
Qazaqstan jahandyq deńgeıdegi beıbit bastamalardy qoldaıtynyn jetkizip, kez kelgen shıelenisti dıalog pen kelissóz arqyly retteýdiń mańyzdylyǵyn atap ótti. Sonymen qatar jaǵdaıdyń tez turaqtanyp, janjaldyń beıbit jolmen sheshilýine úmit bildirdi.
«Irandaǵy qaıǵyly oqıǵalar saldarynan Iran Islam Respýblıkasynyń rýhanı kóshbasshysy aıatolla Seıed Álı Hameneı men eldiń basshylyq ókilderiniń, sondaı-aq, beıbit turǵyndardyń, onyń ishinde balalardyń qaza bolǵany týraly sýyt habardy aýyr kúızelispen qabyldadyq. Osyǵan baılanysty Qazaqstan Respýblıkasynyń Prezıdenti Qasym-Jomart Kemeluly Toqaevtyń, Qazaqstan halqynyń jáne Parlamenttiń atynan barsha Iran halqyna jáne qaza tapqandardyń týǵan-týystaryna qaıǵyra kóńil aıtamyz. Memleket basshysy halyqaralyq daý-janjaldar men shıelenisterdi tek saıası-dıplomatııalyq jolmen jáne BUU Jarǵysy men halyqaralyq quqyqtyq normalary aıasynda sheshý qajet ekenin únemi aıtyp keledi. Qarýly qaqtyǵystar kezinde beıbit halyq pen azamattyq nysandardy qorǵaý basty mindetterdiń biri ekeni anyq. Qazaqstan bul baǵyttaǵy jahandyq bastamalardy qoldaı otyryp, kez kelgen jaǵdaıda adamgershilik qaǵıdattarǵa taban tireý jáne halyqaralyq shıelenister men qaqtyǵystardy dıalog pen kelissózder arqyly sheshý kerektigin erekshe atap ótedi. Jaǵdaı tezirek turaqtalyp, janjal retteledi dep úmittenemiz», dedi Máýlen Áshimbaev.
Áńgime barysynda Irannyń Qazaqstannyń jaqyn seriktesteriniń biri ekeni aıtylyp, Qazaqstan tarapynyń qaqtyǵysty beıbit retteýge yqpal etýge daıyn ekeni de atap ótildi.
Irannyń drony Ázerbaıjan aýmaǵyna qulady: Shekaraǵa ásker toptastyrylyp jatyr
Eske sala keteıik, Izraıl 28 aqpan, senbi kúni tańerteń Iranǵa soqqy jasady. AQSh prezıdenti Iranǵa qarsy áskerı operasııanyń kúsheıe túsetinin málimdep, óńirdegi jaǵdaıdyń kútpegen baǵytta órbigenin aıtty.