Qazaqstan Jazýshylar odaǵynyń múshesi, aqyn, jýrnalıst Baımahanbet Ahmettiń týǵan jeri – Talas topyraǵynda prozalyq «Jadymdaǵy jańǵyryqtar» jáne óleńderden quralǵan «Kúbir» atty jınaqtary jergilikti oqyrman qaýymǵa tanystyryldy.
«Tabıǵaty ózgeshe talant ıesi» taqyrybyndaǵy ádebı-sazdy keshke ulasqan is-sharada sóz alǵan aýdan ákimi Nurbol Júnisbekov jerles aqynnyń shyǵarmalary týraly oı qozǵap, Baımahanbet Ahmettiń keýdesine «Talas aýdanyna sińirgen eńbegi úshin» tósbelgisin taqty.
Keıinnen aýdan ákimi Nurbol Júnisbekov, jazýshy Elen Álimjan, «Aulieata-Media» JShS-nyń bas dırektory Oralhan Dáýit, Qazaqstan Jazýshylar odaǵy Jambyl oblystyq fılıalynyń dırektory Hamıt Esaman, aqyn, Qazaqstan Jazýshylar odaǵynyń múshesi Ǵaını Álimbekova bastaǵan qonaqtar eki birdeı jınaqtyń tusaýyn kesti.
Is-shara barysynda jergilikti qalamgerler Baıekeńe degen yqylastaryn ystyq lebizderi arqyly jetkizip, qalamgerdiń denine saýlyq, qalamyna qýat tiledi. О́z kezeginde kesh ıesi «Elge sálem» atty óleńin oqyp, jerlesteriniń qoshemetine bólendi.
Keıinnen sóz alǵan B.Ahmet Mádenıet úıine jınalǵan jurtshylyq tarapynan qoıylǵan túrli saýaldarǵa jan-jaqty jaýap berip, kitaptyń tanystyrylymyna kelgen qonaqtarǵa, is-sharany uıymdastyrǵan jergilikti atqarýshy bılikke degen rızashylyǵyn jetkizdi.
Jambyl oblysy,
Talas aýdany