Prezıdenttikke kandıdat Qaraqat Ábden otbasy jáne demografııa mınıstrligin qurýdy usyndy. Bul usynysty ol Túrkistan qalasynda ótken saılaýaldy kezdesýde aıtty.
Kandıdat atap ótkendeı, qoǵamdaǵy kóp máseleniń túp-tamyry otbasydan taraıdy. Balalardyń úlgerimi, tulǵa retinde qalyptasýy, sýısıd, turmystyq zorlyq-zombylyq, analar men qarııalarǵa qatysty problemalardyń barlyǵy otbasyndaǵy tárbıege baryp tireledi. Qazir otbasy máselesi túrli vedomstvolardyń arasynda «shashyrap» júr. Onyń aıtýynsha, otbasy máselelerimen áleýmettik qorǵaý, aǵartý, ǵylym jáne joǵary bilim, densaýlyq saqtaý, ishki ister mınıstrlikteri, ákimdikter men ózge de organdar aınalysady.
«Otbasy jáne demografııa máselelerimen aınalysyp júrgen quzyretti vedomstvolardyń arasynda ózara baılanys joq. Otbasy ınstıtýtyn bulaısha qoldaý múmkin emes. Otbasy men otbasy músheleri bul mınıstrlikter úshin ındıkator ǵana. Mysaly, neke turaqsyzdyǵy esh tragedııa emes, bazadaǵy jazbanyń ózgerýi ǵana. Memorgandardyń eshqaısysy azamattarǵa «otbasy», «otbasy múshesi» degen tutas uǵymmen qaramaıdy, jekelegen adam retinde ǵana qaraıdy. Al bizge eń aldymen otbasy mańyzdy. Onyń tutastyǵy, baqytty bolýy mańyzdy», dedi kandıdat.