Qazaqstan Respýblıkasynyń prezıdenttigine kandıdat Saltanat Tursynbekova respýblıkalyq psıhıkalyq densaýlyq ǵylymı-praktıkalyq ortalyǵynyń Pavlodar qalasyndaǵy fılıalynda boldy.
Ortalyqta ishimdik pen esirtkige táýeldi azamattar ońaltýdan ótedi. «Meni osy máseleni jaqsy biletin adam retinde qabyldaǵandaryńyzdy qalaımyn. О́ıtkeni bul másele jaqyn adamdarymnyń da ómirinde boldy. Barsha qazaqstandyqtardyń basynda mundaı keleńsiz jaǵdaı eshqashan bolmaǵanyn qalaımyn. Pavlodardaǵy ortalyqqa osy sebeppen keldim. Árıne, bizdiń aımaqtyq shtab zaýyt, aýrýhana sekildi mekemelerdi usyndy. Biraq men sizderdiń máselelerińizge beıjaı qaraı almaımyn, eldegi esirtki men ishimdiktiń taralýyna baılanysty ahýaldy ózgertkim keledi», dedi ol.
S.Tursynbekova álemdik jáne otandyq statıstıkany eske saldy. «Álemde psıhoaktıvti zattardy belsendi túrde qoldanatyn shamamen 275 mıllıon adam bar. Esirtki jyl saıyn 500 myńnan astam adamnyń ólimine sebepker bolady. 19 mıllıon halqy bar Qazaqstan úshin esirtki tutynýdyń az ǵana kórsetkishi ulttyq qaýipsizdikke úlken qaýip tóndiredi. Densaýlyq saqtaý mınıstrliginiń málimetinshe, elimizde 18,5 myńnan astam nashaqor tirkelgen. Onyń ishinde 1,5 myń áıel bar», dedi kandıdat.