Gúrji halqynyń yqylasyna bólendi

«Astana Balet» teatrynyń dırek­tory Aleksandr Sovostıanov óz sózinde gas­troldik saparǵa asqan jaýap­ker­shilik­pen qarap, kórermen kóńilinen shyǵatyn baǵdarlama usynylǵanyn jetkizdi.

Anshlagpen ótken óner saparynyń alǵashqy kúni otandyq balet trýppasy L.Shıfrın, A.Pıassollo, K.Gardel jáne S.Kosýgı mýzykasyna Rıkardo Amaranten qoıǵan «A Fuego Lento» neo­klassıkalyq baleti men Oskar Ýald­tiń pesasy jelisimen Fazyl Saı mýzykasyna teatrdyń bas baletmeısteri Mýkaram Avahrı qoıǵan «Salomeıa» spektaklin sahnalap, qazaq balet óneriniń mereıin asyrdy.

«Balet ártisi úshin gastroldik sapar­dyń jóni bólek. Osy rette Tbılısıdiń kóne teatrynyń sahnasynda óner kór­setý – zor jaýapkershilik júktedi. Bul biz úshin kezekti synaq bolsa da, odan súrinbeı óttik dep aıta alamyn. Kórer­mender ártisterimizdiń ónerine dán rıza boldy», dedi teatrdyń kórkemdik jetekshisi Nurlan Kanetov.

Ásirese Qazaqstannyń eńbek sińirgen qaıratkerleri Aıgúl Tátı men Mýkaram Avahrı qoıǵan «Uly dala murasy» atty konserttik baǵdarlama Grýzııa jurt­shylyǵyn ulttyq mýzykamyzdyń áýezdi áýenine uıytyp, kórkem beıneler men horeografııa órnegine tánti etti.

«Teatrymyzdyń bet-beınesi baı klassıkalyq mura men zamanaýı balet óneriniń negizinde qalyptasty. Sonyń arqasynda ulttyq bıimizdi úlken sahnaǵa shyǵaryp, álemge kórsetý múmkindigi týdy. Biz qazaq bıin oı ele­ginen ótkizip, onyń úılesimdiligi men sulýlyǵyn asha túsetin sony horeografııalyq mınıatıýralar shy­ǵarýǵa erekshe kóńil bólip kelemiz. Ulttyq horeografııalyq plastıka – qazaq mádenıetin tanytýdyń bir amaly. Sol sebepti, ulttyq bı teatry­myz­dyń barlyq gastroldik saparynyń sánin keltiredi», dedi Aıgúl Tátı.

Aıta keteıik, bekzat óner ordasynyń gastroldik saparyna Mádenıet jáne sport mınıstrligi qoldaý kórsetti.