Qazaqstan Respýblıkasy prezıdenttigine Jalpyulttyq sosıal-demokratııalyq partııasy atynan kandıdat Nurlan Áýesbaev Aqmola oblysy Shortandy kentinde saılaýshylarmen kezdesti.
Is-shara barysynda jınalǵan qaýymǵa óziniń saılaýaldy baǵdarlamasynyń basym baǵyttary jóninde baıandap berdi. Turǵyndar ózderin alańdatqan saýaldarǵa tushymdy jaýap aldy.
Qajetti ınfraqurylym joqtyǵy sekildi Qazaqstannyń birqatar óńirine tán másele Shortandyda da ózekti. Nurlan Áýesbaevtyń pikirinshe, jaǵdaıdy túzetý úshin jergilikti ózin-ózi basqarýdy kúsheıtý kerek. Kandıdat barlyq deńgeıli depýtattardy bir mandattyq okrýgterden ǵana saılaý qajet dep esepteıdi. Sol kezde ǵana halyq qalaýlylary saılaýaldy baǵdarlamasynda aıtqan ýádelerinde turyp, jaýapkershilikti sezinetin bolady.
«Bılikte de ózgerister bolýy qajet. Qazaqstan parlamenttik-prezıdenttik basqarý úlgisine ótýge tıis. Bul degenimiz, prezıdenttiń ókilettikteri tolyqtaı qaıta qarastyrylady. Memleketti basqarýdaǵy basty ról parlamentke tıesili bolýy kerek. Zań shyǵarýshy organdy qaıta jasaqtaý qajet. Depýtattardyń 50%-y partııa tizimderi boıynsha saılanýy qajet. Halyq qalaýlylarynyń teń jartysy bir mandattyq okrýgterden quralýǵa tıis», deıdi úmitker.