Parlament Senatynyń Tóraǵasy Máýlen Áshimbaev elimizdegi kezekten tys Prezıdent saılaýyn baqylaý úshin Qazaqstanǵa kelgen TúrkPA baıqaýshylarymen kezdesti, dep habarlaıdy Egemen.kz Senattyń baspasóz qyzmetine silteme jasap.
Sóz basynda Máýlen Áshimbaev 13 qarashada Ystanbulda bolǵan lańkestik árekettiń saldarynan adamdardyń qaza bolýyna baılanysty Túrik parlamentshilerine kóńil aıtty. Sondaı-aq zardap shekkenderdiń tezirek saýyǵyp ketýine tilektestigin jetkizdi.
Kezdesý barysynda Senat Spıkeri TúrkPA ókilderine elimizdegi Prezıdent saılaýyna monıtorıng júrgizýge qatysyp jatqany úshin alǵysyn bildirip, Qazaqstan baıqaý prosesine úlken mán berip otyrǵanyn aıtty.
Palata Tóraǵasy saılaýdy Qazaqstan Respýblıkasynyń zańnamasyna jáne osy saladaǵy halyqaralyq standarttarǵa tolyq sáıkes ótkizý úshin barlyq qajetti shara qabyldanǵanyn da tilge tıek etti.
Odan bólek, Máýlen Áshimbaev aldaǵy saılaýdyń mańyzdylyǵyna nazar aýdaryp, saıası júıeni odan ári damytý, bılikti monopolııalaýǵa jol beretin táýekelderdi joıý jáne demokratııanyń negizgi qaǵıdattaryn nyǵaıtý baǵytynda júrgizilip jatqan reformalarǵa toqtaldy.
Senat Tóraǵasy atap ótkendeı, Qazaqstanda adam quqyqtaryn qorǵaý júıesin nyǵaıtýǵa, bılik tarmaqtary arasyndaǵy, sondaı-aq ortalyq pen óńirler arasyndaǵy ókilettikter men jaýapkershiliktiń teńgerimin qamtamasyz etýge arnalǵan birqatar mańyzdy konstıtýsııalyq zań qabyldandy.
«Memleket basshysynyń tapsyrmasy boıynsha Májilis pen máslıhattardy qalyptastyrýdyń aralas modeline arnalǵan jáne aýdandyq, oblystyq mańyzy bar qalalar ákimderin saılaýdy kezeń-kezeńimen engizý úshin zańnamalyq baza quryldy. Osy jáne basqa da ózgerister bizdiń azamattarymyzdyń suranystary men múddelerine saı keledi. Sondaı-aq mundaı qadam jańa saıası modeldi qalyptastyrýǵa, adamdardyń memlekettik jáne saıası ınstıtýttarǵa degen senimin nyǵaıtýǵa yqpal etedi», dedi Máýlen Áshimbaev.
О́z kezeginde delegasııa basshysy Erol Kaıa TúrkPA baıqaýshylar mıssııasynyń qyzmeti saılaý naýqanyn obektıvti baǵalaýǵa baǵyttalǵanyn aıtty. Sondaı-aq ol Prezıdenttiń kezekten tys saılaýy el zańnamasyna jáne jalpyǵa birdeı tanylǵan halyqaralyq standarttarǵa sáıkes ótýine tilektestigin bildirdi.
Aıta keteıik, Qazaqstandaǵy prezıdent saılaýyn baqylaý úshin 35 shet memleketten 10 halyqaralyq uıym jáne 641 baıqaýshy akkredıttelgen. Baıqaýshylardyń mıssııalaryna járdemdesý úshin syrtqy ister mınıstrliginde arnaıy shtab quryldy.