Búgin Soltústik Qazaqstan oblysynda Sábıt Muqanov atyndaǵy qazaq mýzykaly-drama teatrynyń jańa ǵımaratynyń ashylý saltanaty ótti. Is-sharaǵa Mádenıet jáne sport mınıstri Dáýren Abaev pen oblys ákimi Qumar Aqsaqalov qatysty, dep habarlaıdy Egemen.kz.
Qonaqtar qatarynda Qazaqstannyń Halyq artısi Aıman Musaqojaeva, Olımpıada chempıony Aleksandr Vınokýrov, Kann kınofestıvaliniń laýreaty Samal Eslıamova, general-leıtenant Abaı Tasbolatov jáne zııaly qaýym ókilderi, qoǵam qaıratkerleri boldy.
Mádenıet jáne sport mınıstri Dáýren Abaev Memleket basshysy Qasym-Jomart Toqaevtyń quttyqtaý hatyn oqyp berdi.
«Barsha qyzyljarlyqtar úshin aıtýly oqıǵa – Sábıt Muqanov atyndaǵy qazaq sazdy-drama teatrynyń jańa ǵımaratynyń ashylý saltanatymen shyn júrekten quttyqtaımyn. Bul tarıhı sát elimizdegi teatr óneriniń jylnamasyna enedi. Egemendik alǵan jyldar ulttyq mádenıetimizdiń qaryshtap órleýiniń jańa dáýiri sanalady.
Elimizde jas talanttardyń shyǵarmashylyq áleýetin arttyrý úshin barlyq jaǵdaı jasalýda.
Shırek ǵasyrǵa jýyq tarıhy bar Sábıt Muqanov atyndaǵy qazaq teatrynyń kıeli sahnasynda 100-den astam dramalyq shyǵarmalar qoıylyp, kórermenniń kózaıymyna aınaldy. Ujym shyǵarmashylyq izdenistiń arqasynda respýblıkalyq jáne halyqaralyq teatr festıvalderinde talaı bıikterdi baǵyndyrdy.
О́ner ordasynyń qabyrǵasynan álemge tanymal kınoaktrısa Samal Eslıamova, rejısser Farhat Moldaǵalı sııaqty daryndy jastar túlep ushty. Qazaq mádenıeti ónerdiń barlyq salasynda ǵalamdyq mádenı muranyń tanymal bóligi bolýy tıis. Sizderge osy baǵytta mol shyǵarmashylyq tabys, jarqyn izdenister, sátti jobalar jáne kórermenderdiń mahabbatyn tileımin», dep jazylǵan Prezıdenttiń quttyqtaý hatynda.
Qala turǵyndary men qonaqtaryn quttyqtaı otyryp, Mádenıet jáne sport mınıstri Dáýren Abaev Soltústik Qazaqstannyń aýmaǵy ataqty aqyndar men jazýshylardyń kıeli mekeni ekenin atap ótti.
«Teriskeıdiń temirqazyq teatry jańa ǵımaratqa kirip, qazaq óneri, ult rýhanııaty úlken qýanyshqa kenelip jatyr. Bul – tek Soltústik Qazaqstan oblysynyń ǵana emes, tutas halqymyzdyń ortaq oljasy. Sebebi kıeli Qyzyljar topyraǵy – saharany sahna etken qanshama sal-seriniń kıeli besigi. Ejelden elge tuǵyr bolǵan qart Qyzyljar – qazaq óneriniń tóri men tórkinindeı.
Bul berekeli mekende Maǵjan Jumabaev, Sábıt Muqanov, Ǵabıt Músirepov, Safýan Shaımerdenov sııaqty halqymyzdyń birtýar tulǵalary dúnıege kelgen. Sondyqtan biz úshin bul óńir qashanda sazben syrlasyp, tarıhpen tynystap jatqandaı bolady», dedi mınıstr Dáýren Abaev.
Shyndyǵynda búgingi kún soltústikqazaqstandyqtar úshin kópten kútken jáne eleýli oqıǵa bolǵany anyq. SQO-da biregeı arhıtektýrasy bar taǵy bir nysan paıda boldy. Aldaǵy ýaqytta jańa qazaq teatry qalanyń basty kórikti jerine aınalatyny sózsiz.
«Teatr-rýhanı, mádenı jáne tarıhı ortalyq. Qoǵamdy damytý úshin ekonomıkamen qatar óner salasyn da damytý kerek. Elde bilimdi, mádenıetti jáne erkin oıly azamattardy qalyptastyrý úshin jaǵdaı jasaý mańyzdy. Bizge rýhanı qundylyqtarǵa negizdelgen qoǵam qajet. О́nerge jaqyn adam árkez joǵary standarttarǵa umtylady», dedi Qumar Aqsaqalov.
Resmı bólimnen keıin arnaıy shaqyrylǵan qonaqtar men ónersúıer qaýym Sábıt Muqanovtyń povesi negizinde qoıylǵan «Shoqan» spektakliniń premerasyn tamashalady.