Astana qalasyndaǵy órtte adamdardyń ómirin qutqarý kezinde batyrlyq tanytqan Asqar Zabıkýlın qaıtys boldy, dep habarlaıdy Egemen.kz.
TJD baspasóz qyzmetinen jazǵandaı, Asqardy aman alyp qalý úshin dárigerler birneshe táýlik boıy aıanbaı eńbek etken.
Tótenshe jaǵdaılar mınıstrliginiń ujymy marqumnyń týystary men jaqyndaryna kóńil aıtty.
«Tótenshe jaǵdaılar mınıstrliginiń ujymy Asqar Zabıkýlınniń týǵan-týystaryna, jaqyndaryna qaıǵyra kóńil aıtady. Ol óz isiniń mamany retinde jadymyzda máńgi qalady. Asqar aqjarqyn adam, jaýapty qyzmetker, kásibı órt sóndirýshi jáne saýatty maman boldy. Áriptesteri arasynda ádil, óz mamandyǵyn súıetin qyzmetker retinde qurmetke ıe», delingen vedomstvo habarlamasynda.
Asqardyń artynda áıeli men eki balasy qaldy. Tótenshe jaǵdaılar mınıstrligi marqum bolǵan órt sóndirýshiniń otbasyna jan-jaqty kómek pen qoldaý kórsetetinin qosty.
Eske salaıyq, 16 qarashada elordalyq órt sóndirýshiler Astanada órtenip jatqan páterden bes adamdy aman alyp qalǵan bolatyn. Keıin Tótenshe jaǵdaılar mınıstrligi habarlaǵandaı, órtti sóndirý kezinde órt sóndirýshilerdiń ózderin de kúıik shalǵan. Qazirgi tańda órttiń shyǵý sebebi anyqtalyp jatyr.